ഇന്ത്യൻ ഭരണഘടന അംഗീകരിച്ചതിൻ്റെ 75-ാം വാർഷികത്തിലെ പ്രതിജ്ഞ: 

ബുൾഡോസറുകളെ പിന്നിലേക്ക് തള്ളിമാറ്റുക 

 [സി പി ഐ (എം എൽ) കേന്ദ്ര കമ്മിറ്റി പ്രസിദ്ധീകരിച്ച പ്രസ്സ് റിലീസ്]  . 

'ബുൾഡോസർ രാജ്' എന്ന മാതൃക 'നീതി'യുടെയും 'ശക്തമായ ഭരണത്തിൻ്റെയും' അടയാളമായി ബി.ജെ.പി പ്രചരിപ്പിക്കുമ്പോഴും, സുപ്രീം കോടതിയുടെ  രണ്ട് സമീപകാല വിധിന്യായങ്ങൾ ഭരണകൂടത്തിന്റെ രക്ഷാകർതൃത്വത്തിൽ നടക്കുന്ന നിയമലംഘനത്തിന് മേൽ കനത്ത പ്രഹരമേൽപ്പിക്കുന്നവയാണ്. 2019ൽ മഹാരാജ്ഗഞ്ച് ജില്ലയിൽ മാദ്ധ്യമപ്രവർത്തകൻ മനോജ് തിബ്രേവാൾ ആകാശിൻ്റെ വീട് അനധികൃതമായി  തകർത്തതിന് ചീഫ് ജസ്റ്റിസ് ഡി വൈ ചന്ദ്രചൂഡ്, ജസ്റ്റിസുമാരായ ജെ ബി പർദിവാല, മനോജ് മിശ്ര എന്നിവരടങ്ങിയ മൂന്നംഗ ബെഞ്ച് നവംബർ 6ന്  യുപി സർക്കാരിന് മേൽ 25 ലക്ഷം രൂപ പിഴ ചുമത്തി. കേവലം 3.7 ചതുരശ്ര മീറ്റർ  കൈയേറ്റത്തിൻ്റെ പേരിൽ യുപി സർക്കാർ എടുത്ത  നടപടി തികച്ചും അനുപാതരഹിതമെന്ന് കോടതി  കണ്ടെത്തുകയായിരുന്നു. കൂടാതെ , നിയമാനുസൃതമായ  നടപടിക്രമത്തിന്റെ സമ്പൂർണ്ണമായ ലംഘനമാണ് ബുൾഡോസർ ഉപയോഗിച്ചുള്ള വീട് പൊളിക്കൽ എന്ന് കോടതി കണ്ടെത്തി.  കൃത്യം ഒരാഴ്‌ചയ്‌ക്ക് ശേഷം, 'ബുൾഡോസർ നീതി' എന്ന ബി.ജെ.പി യുക്തിക്കെതിരെ  കൂടുതൽ സമഗ്രമായ കുറ്റപത്രം മറ്റൊരു കേസ്സിലെ സുപ്രീം കോടതിവിധിയിലൂടെ  വന്നു.  ജസ്റ്റിസുമാരായ ബി.ആർ.ഗവായ്, കെ.വി.വിശ്വനാഥൻ എന്നിവരടങ്ങിയ രണ്ടംഗ ബെഞ്ച്, വർദ്ധിച്ചുവരുന്ന പൊളിക്കലുകളെ ദുരുദ്ദേശ്യപരവും ഭരണഘടനാ വിരുദ്ധവുമാണെന്ന് വിശേഷിപ്പിച്ച് വിപുലമായ ഒരു കുറ്റപ്പെടുത്തൽ നടത്തി.  ഏതെങ്കിലും പൊളിക്കലിൻ്റെ നിയമസാധുത സ്ഥാപിക്കുന്നതിന് ഭരണകൂടത്തെ ബാദ്ധ്യതപ്പെടുത്തുന്ന  കൃത്യമായ  മാർഗ്ഗനിർദ്ദേശങ്ങൾകൂടിയു ൾക്കൊള്ളുന്നതായിരുന്നു പ്രസ്തുത ബെഞ്ചിന്റെ വിധി. 

ആൾക്കൂട്ടക്കൊലപാതകങ്ങൾക്കും സർക്കാർ സ്‌പോൺസർ ചെയ്‌ത സ്വകാര്യവൽക്കരിച്ച അക്രമത്തിൻ്റെ മറ്റ് രീതികൾക്കുമൊപ്പം, ബുൾഡോസറിൻ്റെയും ഏറ്റുമുട്ടൽ കൊലപാതകങ്ങളുടെയും  ആയുധവൽക്കരണത്തിന്റെ നിയമബാഹ്യ സ്വഭാവവും  മോദി-ഷാ-യോഗി കാലഘട്ടത്തിലെ ഫാസിസ്റ്റ് ഭീകരതയുടെയും ആക്രമണത്തിൻ്റെയും ഏറ്റവും നിർണായക അടയാളമായി ഉയർന്നുവന്നിട്ടുണ്ട്. ഈ ഫാസിസ്റ്റ് ഭരണകൂടത്തിൻ്റെ പ്രധാന പരീക്ഷണശാലയായ മാറിയ യു പിയിൽ അടക്കം  നടപ്പാക്കുന്ന 'ബുൾഡോസർ മോഡലിൻ്റെ' ശരിയായ  അർത്ഥമാണ് ഇപ്പോൾ സുപ്രീം കോടതി വിധികൾ തുറന്നുകാട്ടിയത്. ഒരു കുടുംബത്തിൻ്റെ ആജീവനാന്ത സമ്പാദ്യം ഉപയോഗിച്ച് നിർമ്മിച്ച വീട് അനധികൃതമായി പൊളിക്കുന്നത്  പാർപ്പിടത്തിനും ജീവിക്കാനുമുള്ള ഏതൊരു പൗരൻ്റെയും മൗലികാവകാശത്തെ ലംഘിക്കുന്നു. ഒരു വ്യക്തി നടത്തിയതായി  അനുമാനിക്കപ്പെടുന്ന കുറ്റകൃത്യത്തിന് ഒരു കുടുംബത്തെ കൂട്ടായി ശിക്ഷിക്കുക എന്നത്  നീതിയുടെ അടിസ്ഥാന തത്വത്തെ തകിടം മറിക്കുകയും ,   ജുഡീഷ്യറിയുടെ അധികാരങ്ങൾ എക്സിക്യൂട്ടീവ് കവർന്നെടുക്കുകയും ചെയ്യുന്നതിന് സമമാണ് . ഇത്തരം കയ്യേറ്റങ്ങൾക്ക്  മുസ്‌ലിംകളെയും അധ്വാനിക്കുന്ന ജനവിഭാഗങ്ങളെയും വിയോജിക്കുന്ന പൗരന്മാരെയും തെരഞ്ഞെടുത്ത ലക്ഷ്യങ്ങളാക്കുന്നത് ഇന്ത്യൻ ഭരണഘടനയുടെ മതേതര ജനാധിപത്യ അടിത്തറയെ ബുൾഡോസർ ചെയ്യുന്നതിന് തുല്യമാണ്. 

ബി.ജെ.പിയുടെ ബുൾഡോസർ ആക്രമണത്തിന് ഇരയായവർക്ക് സുപ്രീം കോടതി വിധികൾ മുൻകാലപ്രാബല്യത്തോടെ നീതി നൽകുന്നില്ലെങ്കിലും,  ഭാവിയിൽ പൊളിക്കലുകൾ തടയാൻ  യഥാർത്ഥത്തിൽ എക്സിക്യൂട്ടീവിന് ജുഡീഷ്യറി നൽകിയ ഉത്തരവാദിത്തം നടപ്പിലാക്കുമോ എന്ന് കണ്ടറിയണം. ഭരണഘടനയുടെ അടിസ്ഥാന മൂല്യങ്ങൾക്കും തത്ത്വങ്ങൾക്കും നേരെയുള്ള ഗുരുതരമായതും വർദ്ധിച്ചുവരുന്നതുമായ ഭീഷണിയെക്കുറിച്ച് ഇന്ത്യയിലെ ജനങ്ങൾ മനസ്സിലാക്കുന്നത് കേവലം വ്യക്തമായ ഭേദഗതികൾ പാസ്സാക്കുന്നതിൻ്റെ രൂപത്തിൽ മാത്രമല്ല, ഭരണഘടനയുടെ സ്പിരിറ്റിന്റെ  നഗ്നമായ ലംഘനമായ നയങ്ങളിലൂടെയും നടപടികളിലൂടെയും സംഭവിക്കുന്നതാണ് ഭരണഘടനയ്‌ക്കെതിരായ ആക്രമണം . നോട്ട് നിരോധനം, പിഎം കെയേഴ്സ് ഫണ്ട് തുടങ്ങിയ ഭരണഘടനാ വിരുദ്ധ നടപടികളിൽ നിന്ന് രക്ഷപ്പെടാൻ കോടതികൾ  എക്സിക്യൂട്ടീവിനെ അനുവദിച്ചപ്പോൾ,  ഇലക്ടറൽ ബോണ്ടുകൾ പോലെയുള്ള ഏകപക്ഷീയവും അഴിമതി നിറഞ്ഞതുമായ ചില നടപടികൾ മാത്രമേ ജുഡീഷ്യറി നിർത്തലാക്കിയുള്ളൂ. എന്നാൽ ജുഡീഷ്യൽ ഇടപെടലിൻ്റെ പരിമിതമായ സന്ദർഭങ്ങൾ പോലും  ഭരണഘടനയെ അട്ടിമറിക്കുന്നതിൻ്റെ യഥാർത്ഥവും വളരുന്നതുമായ ഭീഷണിയിലേക്ക് ഇന്ത്യയിലെ ജനങ്ങളുടെ തിരിച്ചറിവിന് പ്രേരകമാണ്. 

ഭരണഘടന അംഗീകരിച്ചതിൻ്റെ എഴുപത്തിയഞ്ചാം വാർഷികവും (2024 നവംബർ 26) ഒപ്പം റിപ്പബ്ലിക് ദിനവും  ഭരണഘടനയുടെ നിർവ്വഹണവും (26 ജനുവരി, 2025)   രാജ്യം  ആഘോഷിക്കാനിരിക്കെയാണ് ഭരണഘടനയ്‌ക്കെതിരായ ഈ ആക്രമണം തീവ്രമാകുന്നത് എന്നത് ശരിക്കും ഒരു വിരോധാഭാസമാണ്. ദൗർഭാഗ്യകരമായ വിഭജനത്തിൻ്റെ ദുരന്തവും ദശലക്ഷക്കണക്കിന് ആളുകളെ ബാധിച്ച അഭൂതപൂർവമായ രക്തച്ചൊരിച്ചിലിൻ്റെയും കുടിയിറക്കലിൻ്റെയും ആഘാതത്തോടൊപ്പം ബ്രിട്ടീഷ് കൊളോണിയൽ ഭരണത്തിൽ നിന്ന് ഇന്ത്യ സ്വതന്ത്രമായി രണ്ട് വർഷത്തിന് ശേഷമാണ് ഇന്ത്യൻ ഭരണഘടന അംഗീകരിച്ചത്. എന്നിട്ടും,  വിഭജനത്തിൻ്റെ ആഘാതത്തിന് ഭരണഘടനയിൽ നിഴൽ വീഴ്ത്താൻ കഴിയാത്ത വിധം കൊളോണിയൽ വിരുദ്ധ പ്രസ്ഥാനത്തിൻ്റെ ആഘാതവും സമത്വ സാമൂഹിക ക്രമത്തിൻ്റെ സ്വപ്നങ്ങളും അന്ന് വളരെ ശക്തമായിരുന്നു. ഭരണഘടനയോടും അതിൻ്റെ മതേതര ജനാധിപത്യ ആഭിമുഖ്യത്തോടുമുള്ള കടുത്ത എതിർപ്പിലൂടെ യഥാർത്ഥത്തിൽ അന്ന് ഒറ്റപ്പെട്ടത് ആർഎസ്എസും ഹിന്ദുത്വ തീവ്രവലതുപക്ഷവുമായിരുന്നു. 

ഇന്ന് എഴുപത്തഞ്ചു വർഷത്തിനു ശേഷം, സംഘ്-ബിജെപി ശക്തികൾക്ക്  ഭരണകൂട അധികാരത്തിൽ വേരോട്ടം ഉണ്ടായിരിക്കുന്നു.  ഇന്ത്യയുടെ സാമ്പത്തിക, വിദേശ നയങ്ങളിൽ വലതുപക്ഷ കോർപ്പറേറ്റ് അനുകൂല, സാമ്രാജ്യത്വ അനുകൂല മാറ്റങ്ങൾ  ആസൂത്രണം ചെയ്യാനും, ഭരണഘടനയെ വെല്ലുവിളിക്കാനും അട്ടിമറിക്കാനും അവകാശങ്ങളെ ചവിട്ടിമെതിക്കാനും കൂടുതൽ ശക്തമായ നിലയിൽ അവർ സ്വയം പ്രതിഷ്ഠിച്ചിരിക്കുന്നു.  ഇന്ത്യയിലെ ദുർബ്ബലമായ ജനാധിപത്യ സ്ഥാപനങ്ങൾ ഫാസിസ്റ്റ് ആക്രമണത്തെ ചെറുക്കുന്നതിൽ പരാജയപ്പെടുന്നതായി പൊതുവിൽ  കാണപ്പെടുമ്പോഴും, ഇന്ത്യയുടെ പരമാധികാര ശക്തിയുടെ ഉറവിടമായ  ജനങ്ങൾ ഫാസിസ്റ്റ് ആക്രമണത്തെ പരാജയപ്പെടുത്താൻ ഭരണഘടനയ്ക്ക് ചുറ്റും അണിനിരക്കാനുള്ള കഴിവ് തെളിയിച്ചിട്ടുണ്ട്. ഹിന്ദുത്വയുടെ ഹൃദയഭൂമിയും ബുൾഡോസർ രാജിൻ്റെ പരീക്ഷണശാലയുമായ ഉത്തർപ്രദേശിൽ തന്നെ ലോക്‌സഭാ തെരഞ്ഞെടുപ്പിൽ ബി.ജെ.പിക്ക് ഞെട്ടിപ്പിക്കുന്ന തകർച്ച നേരിട്ടിരുന്നുവെങ്കിൽ, ഈ ഫാസിസ്റ്റ് വിരുദ്ധ ജനസഞ്ചയത്തിൻ്റെ നിർണ്ണായക ബിന്ദുവായി വർത്തിച്ചത് നമ്മുടെ  ഭരണഘടനയായിരുന്നു. മഹാരാഷ്ട്രയിലും ജാർഖണ്ഡിലും നടന്നുകൊണ്ടിരിക്കുന്ന തെരഞ്ഞെടുപ്പുകളിൽ പോലും, ഇന്ത്യാ മുന്നണിയുടെ രാഷ്ട്രീയ  വേദിയിൽ  ഭരണഘടനയെ പ്രതിരോധിക്കാൻ നടത്തപ്പെടുന്ന ശ്രമങ്ങളെ  അപകീർത്തിപ്പെടുത്താൻ ബിജെപി ഞെട്ടിക്കുന്ന നുണകളും അപവാദങ്ങളും അഴിച്ചുവിടുന്ന രീതി അവലംബിക്കുന്നു - 'അർബൻ നക്‌സൽ' എന്ന വിശേഷണം ചാർത്തിയും മറ്റുമാണ് അവർ അത് ചെയ്യുന്നത്. ഭരണഘടനയുടെ ചുവന്ന പുറം ചട്ട ചൂണ്ടിക്കാട്ടി അതിൽ  "ചൈനീസ്" (കമ്മ്യൂണിസ്റ്റ്/വിദേശി ) താൽപ്പര്യങ്ങൾ  ആരോപിക്കൽ മുതൽ , വെറും പുറംചട്ട മാത്രം പ്രദർശിപ്പിച്ചു നടക്കുന്നതിനു കോണ്ഗ്രസ്സുകാർ അടക്കമുള്ള രാഷ്ട്രീയ എതിരാളികളെ ആക്ഷേപിക്കൽ വരെ അവരുടെ നുണപ്രചാരങ്ങൾ പോകുന്നു. ഇന്ത്യൻ ഭരണഘടന രൂപപ്പെട്ടത്തിന്റെ 75-)0 വാർഷിക ദിനമാചരിക്കുമ്പോൾ ജനങ്ങളുടെ ഐക്യത്തിനും അവകാശപ്പോരാട്ടങ്ങൾക്കും എല്ലാവിധത്തിലുമുള്ള ശക്തമായ പ്രചോദനവും കരുത്തും പകരുന്ന പ്രധാനപ്പെട്ട ഒരു ഊർജ്ജ സ്രോതസ്സായി ഈ ഭരണഘടനയെ നാം ഉയർത്തിപ്പിടിക്കുക.

ഉദയ് പുർ   ഫിലിം ഫെസ്റ്റിവലിൽ നടന്ന  ആർഎസ്എസ് ഗുണ്ടായിസത്തെ സി പി ഐ (എം എൽ) ശക്തമായി അപലപിക്കുന്നു 

നവംബർ 17, 2024 

ഉദയ് പുർ  ഫിലിം ഫെസ്റ്റിവലിൽ ഹദ് അൻഹദ് എന്ന സിനിമയുടെ പ്രദർശനം ആർഎസ്എസ് ഗുണ്ടകൾ തടസ്സപ്പെടുത്തിയതിനെ സി പി ഐ (എം എൽ) ശക്തമായി അപലപിക്കുന്നു. ജനാധിപത്യ ഇടങ്ങൾക്കും പുരോഗമനപരമായ കലാപ്രവർത്തനങ്ങൾക്കും   എതിരായ ഈ നികൃഷ്ടമായ ആക്രമണം, ചൂഷണത്തിനും അനീതിക്കുമെതിരെ ഉയരുന്ന  ഏതൊരു ശബ്ദത്തെയും അടിച്ചമർത്താൻ ശ്രമിക്കുന്ന ഫാസിസ്റ്റ് ഭരണകൂടത്തിൻ കീഴിൽ  സംസാര സ്വാതന്ത്ര്യത്തിന്മേൽ നടക്കുന്ന വർദ്ധിച്ചുവരുന്ന കയ്യേറ്റത്തെയാണ്  പ്രതിഫലിപ്പിക്കുന്നത്. 

വിമർശനാത്മകവും സാമൂഹിക പ്രാധാന്യമുള്ളതുമായ സിനിമയെ പ്രോത്സാഹിപ്പിക്കുന്നതിനുള്ള "സിനിമാ ഓഫ് റെസിസ്റ്റൻസ്" എന്ന  സംരംഭത്തിൻ്റെ ഭാഗമായാണ് ഉദയ്പൂർ ഫിലിം സൊസൈറ്റി  3 ദിവസത്തെ ഫെസ്റ്റിവൽ (നവംബർ 15-17) സംഘടിപ്പിച്ചത്. അധിനിവേശ കുടിയേറ്റ-കൊളോണിയൽ ഇസ്രായേൽ ക്രൂരമായി കൊലപ്പെടുത്തിയ ആയിരക്കണക്കിന് പലസ്തീൻ കുട്ടികളുടെ സ്മരണയ്ക്കായി സമർപ്പിച്ചിരിക്കുന്ന ഈ വർഷത്തെ ഉത്സവത്തിലെ രണ്ടാം ദിവസത്തിലെ ചിത്രമായ   "ഹദ് അൻഹദ് " ന്റെ  പ്രദർശനം സമർപ്പിക്കപ്പെട്ടിരുന്നത്     ജനങ്ങളുടെ അവകാശങ്ങൾക്കുവേണ്ടി അക്ഷീണം പ്രവർത്തിച്ച പ്രൊഫസർ ജി.എൻ. സായിബാബയുടെ ഓർമ്മയ്ക്കായിരുന്നു. പലസ്തീനിൽ ഇസ്രായേൽ കൊലപ്പെടുത്തിയ കുട്ടികൾക്കും, പ്രൊഫസ്സർ ജി എൻ സായിബാബയ്ക്കും ഉള്ള  സമർപ്പണങ്ങൾ നീക്കം ചെയ്യണമെന്ന് ആർഎസ്എസ് ഗുണ്ടകൾ ആവശ്യപ്പെട്ടു, പലസ്തീനികൾക്കെതിരെയും പ്രൊഫസർ സായിബാബക്കെതിരെയും നികൃഷ്ടമായ അധിക്ഷേപങ്ങളാണ് അവർ  നടത്തിയത്. ഹദ് അൻഹദിൻ്റെ പ്രദർശനം നിയമവിരുദ്ധമായ രീതിയിൽ അവർ  നിർത്തിവെപ്പിക്കുകയും ചെയ്തു. 

സംഘാടകർ ആവശ്യമായ എല്ലാ അനുമതികളും നേടിയിട്ടും, ആർഎസ്എസിൻ്റെ ഈ ജനാധിപത്യവിരുദ്ധവും നിയമവിരുദ്ധവുമായ പ്രവൃത്തി തടയുന്നതിൽ ഭരണകൂടം പരാജയപ്പെടുകയായിരുന്നു. ജില്ലാ കളക്ടറുടെ ഇടപെടൽ പോലും ആർഎസ്എസിൻ്റെ ഗുണ്ടായിസം തടയുന്നതിൽ ഫലവത്തായില്ല. 

ഫാസിസ്റ്റ് ഭീഷണിക്കെതിരേ ധീരമായ നിലപാടിൽ  ഉറച്ചുനിന്ന  ഉദയ്പൂർ ഫിലിം സൊസൈറ്റിയുടെ പ്രവർത്തകർക്ക് സി പി ഐ (എം എൽ)  ഉറച്ച ഐക്യദാർഢ്യം പ്രഖ്യാപിച്ചു. പലസ്തീൻ കുട്ടികൾക്കും പ്രൊഫസർ സായിബാബയ്ക്കും വേണ്ടിയുള്ള അവരുടെ സമർപ്പണം നീക്കം ചെയ്യാൻ സംഘാടകർ വിസമ്മതിച്ചതിലൂടെ  ജനാധിപത്യ അവകാശങ്ങൾക്കനുകൂലമായ ധീരമായ  നിലപാട് ആണ് ഫിലിം സൊസൈറ്റി പ്രവർത്തകർ ഉയർത്തിപ്പിടിച്ചത്. 

കബീറിൻ്റെ കവിതകളിലൂടെ സഞ്ചരിച്ച്  അദ്ദേഹത്തിന്റെ മതഭാവനയുടെ  രാഷ്ട്രീയപ്രസക്തി വിളിച്ചോതുന്ന  ഹദ് അൻഹാദ് പോലുള്ള പുരോഗമന സിനിമകളോടുള്ള സംഘപരിവാറിൻ്റെ ഭയം, വളർന്നുവരുന്ന ജനകീയ ബോധത്തെക്കുറിച്ചുള്ള അവരുടെ വ്യാപകമായ ഭീതിയെയാണ്  അടിവരയിടുന്നത്. കല, പ്രത്യേകിച്ച് ജനകേന്ദ്രീകൃത സിനിമ, ചൂഷണാത്മകമായ അവസ്ഥയെ വെല്ലുവിളിക്കുകയും അനീതിക്കെതിരായ ചെറുത്തുനിൽപ്പിന് പ്രചോദനം നൽകുകയും ചെയ്യുന്നു. 

അഭിപ്രായ സ്വാതന്ത്ര്യത്തിന് മേലുള്ള ഈ ആക്രമണത്തെ അപലപിക്കാനും ജനാധിപത്യ ഇടങ്ങൾക്കെതിരായ ആക്രമണങ്ങൾക്കെതിരെ ഒറ്റക്കെട്ടായി നിൽക്കാനും നീതിയെ സ്നേഹിക്കുന്ന എല്ലാ വ്യക്തികളോടും ഞങ്ങൾ അഭ്യർത്ഥിക്കുന്നു. വിയോജിപ്പുകളുടെ നിശബ്ദതയ്‌ക്കെതിരെ ജനപക്ഷ സിനിമയ്ക്കും ചെറുത്തുനിൽപ്പിൻ്റെ സിനിമയ്ക്കും സി പി ഐ (എം എൽ) അചഞ്ചലമായ പിന്തുണ ആവർത്തിക്കുന്നു.

 ട്രംപിൻ്റെ അതിശയകരമായ തിരിച്ചുവരവ് - പാഠങ്ങളും വെല്ലുവിളികളും 

-  [ ദീപങ്കർ ഭട്ടാചാര്യ,  സി പി ഐ (എം എൽ) ജനറൽ സെക്രട്ടറി ] 

നാല് വർഷം മുമ്പ് തെരഞ്ഞടുപ്പ്  പരാജയത്തെത്തുടർന്ന് നടത്തിയ വിഫലമായ ഒരു അട്ടിമറിശ്രമത്തിന് ശേഷം, റിപ്പബ്ലിക്കൻ പാർട്ടിക്ക്‌ ലഭിച്ച  കഴിഞ്ഞ രണ്ട് ദശകങ്ങളിലെ ഏറ്റവും വലിയ  വിജയത്തോടെ യുഎസ് പ്രസിഡൻ്റ് തിരഞ്ഞെടുപ്പിൽ നാടകീയമായ ഒരു തിരിച്ചുവരവ് ആണ് ഇപ്പോൾ ഡൊണാൾഡ് ട്രംപ്  നടത്തിയത്.  പോപ്പുലർ വോട്ടിൻ്റെ അടിസ്ഥാനത്തിൽ വിജയിക്കുന്ന ആദ്യ റിപ്പബ്ലിക്കൻ പ്രസിഡൻ്റും ആണ് അദ്ദേഹം.  സെനറ്റിൻ്റെയും കോൺഗ്രസിൻ്റെയും മേൽ റിപ്പബ്ലിക്കൻ നിയന്ത്രണവുമായി ചേർന്ന്, ഇത് ട്രംപ് 2.0 നെ പഴയ ട്രംപിനെക്കാൾ ശക്തനാക്കും.  തീവ്ര വംശീയതയും സാമ്രാജ്യത്വ വലതുപക്ഷ അജണ്ടയും ആക്രമണോത്സുകമായി നടപ്പാക്കുന്നതിന് കൂടുതൽ പ്രയോജനകരമായ സ്ഥാനത്ത് അത്  ട്രംപിനെ എത്തിച്ചിരിക്കുന്നു.   ഡെമോക്രാറ്റിക് പാർട്ടിയെ സംബന്ധിച്ചിടത്തോളം, ഫലം അവരുടെ ഏറ്റവും മോശം തിരഞ്ഞെടുപ്പ് പരാജയങ്ങളിലൊന്നാണ്.  ട്രംപുമായുള്ള തുടർച്ചയായ മൂന്ന് മത്സരങ്ങളിൽ, ഡെമോക്രാറ്റിക് പാർട്ടിയുടെ രണ്ടാമത്തെയും കൂടുതൽ നിർണ്ണായകവും സമഗ്രവുമായ തോൽവിയാണിത്.  ട്രംപിന്റെ  പ്രസിഡൻ്റ് സ്ഥാനം,  ഡെമോക്രാറ്റിക് പാർട്ടിയുടെ പരിമിതിയ്ക്കും  തകർച്ചയ്ക്കുമപ്പുറമുള്ള  അതിൻ്റെ അശുഭകരമായ പ്രത്യാഘാതങ്ങൾക്ക് അമേരിക്കൻ ജനത ഫലപ്രദമായ ഉത്തരം കണ്ടെത്തേണ്ട അവസ്ഥയാണ് ഇപ്പോൾ സംജാതമായിരിക്കുന്നത്. 

കോവിഡ് മഹാമാരി കൈകാര്യം ചെയ്തതിലെ ട്രംപിൻ്റെ  കെടുകാര്യസ്ഥതയാണ് 2020 ലെ അദ്ദേഹത്തിൻ്റെ നേരിയ  തോൽവിയിൽ പ്രധാന പങ്ക് വഹിച്ചതെങ്കിൽ, ബൈഡൻ-ഹാരിസ് ഭരണകൂടത്തിൻ്റെ മോശം സാമ്പത്തിക റെക്കോർഡുമായി വളരെയധികം ബന്ധമുള്ളതാണ് ഇത്തവണത്തെ ഡെമോക്രാറ്റിക് പാർട്ടിയുടെ പരാജയം. പാൻഡെമിക്കിന് ശേഷമുള്ള വീണ്ടെടുക്കലിൻ്റെ സ്ഥൂല സമ്പദ്ശാസ്ത്രവുമായി ബന്ധപ്പെട്ട  സ്ഥിതിവിവരക്കണക്കുകൾക്ക് അമേരിക്കൻ തൊഴിലാളികൾക്കിടയിൽ അനുരണനം ഉണ്ടായില്ല, വർദ്ധിച്ചുവരുന്ന ജീവിതച്ചെലവും സ്തംഭനാവസ്ഥയിലുള്ള വരുമാനവും, വർദ്ധിച്ചുവരുന്ന ദാരിദ്ര്യം, ഭവനരാഹിത്യം, ആഴത്തിലുള്ള സാമൂഹികവും സാമ്പത്തികവുമായ അരക്ഷിതാവസ്ഥ എന്നിവയാൽ വേട്ടയാടപ്പെടുന്ന ജനങ്ങളുടെ കാര്യം പ്രത്യേകം പറയേണ്ടതില്ല.   അധ്വാനിക്കുന്ന ജനങ്ങളുടെ രോഷവും ഉത്കണ്ഠയും പരിഹരിക്കുന്നതിൽ   ഡെമോക്രാറ്റിക് പാർട്ടി സ്ഥാപനം ഒട്ടും ശ്രദ്ധ ചെലുത്തിയിരുന്നില്ല, മാത്രമല്ല ഈ അരക്ഷിതാവസ്ഥയിൽ മുതലെടുപ്പ് നടത്താനും,  നിയമവിരുദ്ധ കുടിയേറ്റങ്ങൾ  തടയുക എന്ന വ്യാജ പ്രശ്നമുയർത്തി സ്വന്തം  പ്രചാരണം കൊഴുപ്പിക്കാനും ട്രംപിന് സാധിച്ചു. അതിൻ്റെ ഫലം ഇപ്പോൾ ലോകം മുഴുവൻ കാണാനുണ്ട്.  ട്രംപ് 1.0 ന്റെ  കയ്പ്പ് അനുഭവിച്ചിരുന്ന അമേരിക്കൻ ജനത ഇപ്പോൾ ട്രംപ് 2.0 ന്റെ  രൂപത്തിൽ വലിയ ദുരന്തത്തിന് വിധേയരായിരിക്കുകയാണ്. 

ട്രംപിൻ്റെ ഏറ്റവും വലിയ അജണ്ട തീർച്ചയായും ഒരു വലിയ മെഷിനറി വിന്യസിച്ചും 1798 ലെ  "ഏലിയൻ എനിമീസ് ആക്ട് "  ഉൾപ്പെടെയുള്ള എല്ലാത്തരം നിയമങ്ങളും നടപ്പാക്കി വൻതോതിൽ ജനങ്ങളെ നാടുകടത്താനുള്ള അദ്ദേഹത്തിൻ്റെ വാഗ്ദാനമാണ്.  ദശലക്ഷക്കണക്കിന് ആളുകളുടെ ലക്ഷ്യങ്ങൾ ഭരണകൂടാത്താൽ  പ്രവചിക്കപ്പെടുന്നത് അതിന് പുറമേയാണ്.  അമേരിക്കയുടെ ഫെഡറൽ സംവിധാനത്തിൻ കീഴിലെ  സ്ഥാപനപരമായ പരിശോധനകളുടെ സ്വഭാവം  കണക്കിലെടുത്താൽ,  ഇത്തരം നാടുകടത്തൽ അത്ര എളുപ്പമായിരിക്കില്ല. എന്നാൽ അത് അഴിച്ചുവിടുന്ന 'വിദേശി വിരോധം' അഥവാ സെനോഫോബിയ, വംശീയത, ഇസ്‌ലാമോഫോബിയ എന്നിവ കറുത്തവർഗ്ഗക്കാരെയും മുസ്ലീങ്ങളെയും നിറമുള്ള ആളുകളെയും കുടിയേറ്റക്കാരെയും കൂടുതലായി വംശീയ വെറിയ്ക്കും                          വർണ്ണമേധാവിത്വ ​​വിദ്വേഷത്തിന്നും അക്രമത്തിനും  ഇരകളാക്കും.  2016ൽ ആദ്യം ഹിലരി ക്ലിൻ്റണിനെതിരെയും ഇപ്പോൾ എട്ട് വർഷത്തിന് ശേഷം കമലാ ഹാരിസിനെതിരെയും ട്രംപ് തൻ്റെ ധിക്കാരപരമായ സ്ത്രീവിരുദ്ധ രാഷ്ട്രീയത്തിലൂടെ നേടിയ വിജയം, അമേരിക്കൻ രാഷ്ട്രീയത്തിലെ ആഴത്തിലുള്ള പുരുഷാധിപത്യ പക്ഷപാതത്തെ വെളിപ്പെടുത്തുന്നു. 

യുണൈറ്റഡ് സ്റ്റേറ്റ്സ് ഓഫ് അമേരിക്കയിലെ പ്രസിഡൻ്റ് തിരഞ്ഞെടുപ്പ് ഫലം വരുമ്പോൾ,  തീർച്ചയായും ലോകമെമ്പാടും പ്രക്ഷുബ്ധമായി തുടരുകയാണ്.  വർഷങ്ങളായി സാമ്പത്തിക തകർച്ച ഉണ്ടായിട്ടും, അമേരിക്ക ലോകത്തിലെ ഏറ്റവും വലിയ സൈനിക ശക്തിയായി തുടരുന്നു. അതിന്റെ ആഗോള മേധാവിത്വത്തിൻ്റെ നയം ലോകമെമ്പാടുമുള്ള യുദ്ധങ്ങളെയും വംശഹത്യകളെയും മർദ്ദക  ഭരണകൂടങ്ങളെയും നിലനിർത്തുകയും രക്ഷകർത്തൃത്വം വഹിക്കുകയും ചെയ്യുന്ന രാഷ്ട്രീയ-സൈനിക തന്ത്രത്തെ ചുറ്റിപ്പറ്റിയുള്ളതാണ്.  ഡെമോക്രാറ്റിക് വോട്ടർമാരുടെ നിരാശയുടെ ഒരു പ്രധാന കാരണം ഈ ആക്രമണാത്മക സാമ്രാജ്യത്വ, ആധിപത്യ വിദേശ നയത്തിൽ റിപ്പബ്ലിക്കൻമാരും ഡെമോക്രാറ്റുകളും തമ്മിലുള്ള ഉഭയകക്ഷി കരാറാണ്.  പലസ്തീനികൾക്കെതിരേ  ഇസ്രായേൽ തുടരുന്ന വംശഹത്യയിലൂടെ  ഇത് തെളിയിക്കപ്പെടുന്നു.  തെരഞ്ഞെടുപ്പ് പ്രചാരണ വേളയിൽ പോലും, മുൻ യുഎസ് പ്രസിഡൻ്റ് ബിൽ ക്ലിൻ്റൺ ഗാസയിലെ വംശഹത്യയെ 'നിർബന്ധിത' ഇസ്രായേലി പ്രതികരണമെന്ന നിലയിൽ ന്യായീകരിക്കുകയും, ഹമാസിനെ ചർച്ചകളിൽ ക്ഷണിച്ചതിനെ അപലപിക്കുകയും  ചെയ്തിരുന്നു.  ഡെമോക്രാറ്റിക് പാർട്ടിയുടെ ജനകീയ വോട്ടുകൾ 2020-ൽ ഉണ്ടായിരുന്ന  81 ദശലക്ഷത്തിൽ നിന്ന് 2024-ൽ 70 ദശലക്ഷമായി കുറഞ്ഞു വെന്നതിൽ അതിശയിക്കാനില്ല. ഇന്ത്യയിലെ സംഘ് ബ്രിഗേഡും യുഎസിലെ ഇന്ത്യൻ പ്രവാസികളുടെ മോദി അനുകൂല വിഭാഗവും ട്രംപിന്റെ പ്രചാരണത്തെ ശക്തമായി പിന്തുണക്കുകയും വൈറ്റ് ഹൗസിലേക്കുള്ള ട്രംപിൻ്റെ തിരിച്ചുവരവിൽ പ്രകടമായി ആഹ്ലാദിക്കുകയും ചെയ്യുന്നു.  നിലവിലുള്ള യു എസ് പൗരന്മാരും  കുടിയേറ്റക്കാരും ഉൾപ്പെട്ട ഇന്ത്യൻ വംശജരായ ആളുകൾ ട്രംപിൻ്റെ കുടിയേറ്റ വിരുദ്ധ നയങ്ങളുടെയും രാഷ്ട്രീയത്തിൻ്റെയും പ്രധാന ആക്രമണ ലക്ഷ്യങ്ങളായിട്ടും, മോദി സർക്കാറിന്റെ അതേ വാചാടോപം അനുകരിക്കാനും ഇന്ത്യയിലും സമാനമായ അജണ്ട പിന്തുടരാനും അവരിൽ ഗണ്യമായ വിഭാഗങ്ങൾ  ശ്രമിക്കുകയാണ്.   പിലസ്തീനിനെതിരായ വംശഹത്യാ യുദ്ധത്തിൽ ഇസ്രയേലിനുള്ള പിന്തുണയിലും നവ യാഥാസ്ഥിതിക സാമൂഹിക അജണ്ട, നവലിബറൽ സാമ്പത്തിക ദിശ, ഫാസിസ്റ്റ് ഭരണം എന്നിവ പിന്തുടരുന്നതിലും ഇന്നത്തെ ലോകത്തിൽ തീവ്ര വലതുപക്ഷം വലിയ പങ്ക് വഹിക്കുന്നു. ആ അർത്ഥത്തിൽ, 

ട്രംപ്-മോദി സൗഹൃദം തന്ത്രപരമായ ഇന്ത്യ-യുഎസ്  പങ്കാളിത്തത്തിന് അടിവരയിടുന്നതാണ്. 

യുഎസിലെയും ഇന്ത്യയിലെയും ജനാധിപത്യ ശക്തികൾക്കും സാമൂഹിക, സാമ്പത്തിക, കാലാവസ്ഥാ നീതിക്കും വേണ്ടി നിലകൊള്ളുന്നവർക്കും,   ട്രംപിൻ്റെ വിജയത്തിൽ നിന്നും ഡെമോക്രാറ്റിക് പരാജയത്തിൽ നിന്നും പഠിക്കാനുള്ളത് വലിയ പാഠങ്ങളാണ്.   ഫാസിസ്റ്റ് ശക്തികളെ താഴെയിറക്കുകയോ അധികാരം പിടിക്കുന്നതിൽ നിന്ന് അകറ്റി നിർത്തുകയോ ചെയ്യണമെങ്കിൽ, ഫാസിസ്റ്റ് വിരുദ്ധ രാഷ്ട്രീയത്തിന് ജനാധിപത്യത്തെക്കുറിച്ചുള്ള ആഗ്രഹചിന്തകൾ കൊണ്ട് മാത്രം തൃപ്തിപ്പെടാൻ കഴിയില്ല.  പരിവർത്തന ദർശനങ്ങളിലും മുൻഗണനകളിലും നങ്കൂരമിടുന്ന ജനകീയ അന്വേഷണത്തിൻ്റെ ഊർജ്ജം സമാധാനം, നീതി, മനുഷ്യക്ഷേമം, മനുഷ്യാവകാശങ്ങൾ എന്നിവയ്ക്കുവേണ്ടി പ്രയോജനപ്പെടുത്തുമ്പോൾ മാത്രമേ ഇതിൽ  വിജയിക്കാനാകൂ.  ട്രംപ്-മോദി-നെതന്യാഹു ത്രിമൂർത്തികൾ സാമ്രാജ്യത്വം, വംശഹത്യ, അന്യമത വിദ്വേഷം, കോർപ്പറേറ്റ് കൊള്ള, സ്വേച്ഛാധിപത്യ ഭരണം എന്നിവയുടെ വിനാശകരമായ പാക്കേജ് അടിച്ചേൽപ്പിക്കുകയാണെങ്കിൽ, ലോകമെമ്പാടുമുള്ള ജനാധിപത്യ ശക്തികൾ ഈ അപകടകരമായ ഗതിയിൽ നിന്ന് ലോകത്തെ രക്ഷിക്കാൻ ഐക്യദാർഢ്യത്തിൻ്റെ അടുത്ത ബന്ധം സ്ഥാപിക്കേണ്ടതുണ്ട്.

 നവംബറിലെ നിർണ്ണായകമായ തെരഞ്ഞെടുപ്പ് പോരാട്ടങ്ങൾ 

(എഡിറ്റോറിയൽ , എം എൽ അപ്ഡേറ്റ് വോള്യം 27  നവംബർ 5- 11, 2024 ) 

തുടർച്ചയായ മൂന്നാം തവണയും ഹരിയാനയിലെ അമ്പരപ്പിക്കുന്ന വിജയത്തിൻ്റെ കരുത്തിൽ, മഹാരാഷ്ട്രയിൽ അധികാരം നിലനിർത്താനും ജാർഖണ്ഡ് കീഴടക്കാനും സംഘ് ബ്രിഗേഡ് എല്ലാ ശ്രമങ്ങളും നടത്തുകയാണ്.  എല്ലാ നിയമസഭാ തെരഞ്ഞെടുപ്പുകളിലും ബിജെപിയുടെ ഇഷ്ട മുദ്രാവാക്യമായ 'വികസനത്തിന്' 'ഇരട്ട എഞ്ചിൻ' ഗവൺമെൻ്റ് എന്നത് ജനങ്ങളുടെ മുന്നിൽ വെക്കുന്നുവെന്ന്  ഉറപ്പാക്കുന്നു . എന്നാൽ ഇരട്ട എഞ്ചിൻ വാചാടോപത്തിന് ഇനി അധികം ആളെ കിട്ടില്ല എന്ന് പാർട്ടിക്ക് നന്നായി അറിയാം.  മണിപ്പൂരിലെപ്പോലെ ഭരണത്തിൻ്റെ സമ്പൂർണ്ണ തകർച്ച, ബിഹാറിലെന്നപോലെ വർദ്ധിച്ചുവരുന്ന കുറ്റകൃത്യങ്ങളും അഴിമതിയും,  എല്ലാ 'മാതൃകാ' ബിജെപി ഭരണസംസ്ഥാനങ്ങളിലും എന്നപോലെ ഭരണഘടനാ തത്വങ്ങൾക്കും അവകാശങ്ങൾക്കും നേരെ യു പി യിൽ നടക്കുന്ന  നഗ്നമായ കടന്നാക്രമണവും ആണ് ഇന്ന് 'ഇരട്ട എഞ്ചിൻ' പ്രവർത്തിക്കുന്ന ഘടകങ്ങളായി  തിരിച്ചറിയപ്പെടുന്നത്.  ഉത്തരാഖണ്ഡ് മുതൽ  അസമിലേക്കും ത്രിപുരയിലേക്കും നോക്കിയാലും ഇതേ മാതൃകയാണ് കാണുക. എന്നിരുന്നാലും, ബിജെപിയുടെ യഥാർത്ഥ തെരഞ്ഞെടുപ്പ് പ്രചാരണം പാർട്ടിയുടെ മുതിർന്ന പ്രചാരണ മാനേജർമാർ നേരിട്ട് നയിക്കുന്ന മുസ്ലീം വിരുദ്ധ വിദ്വേഷ പ്രചാരണത്തെ ചുറ്റിപ്പറ്റിയുള്ളതാണ്. 

തെരഞ്ഞെടുപ്പ് കമ്മീഷൻ മാതൃകാ പെരുമാറ്റച്ചട്ടം ഗൗരവമായി എടുത്തിരുന്നെങ്കിൽ, ഹിമന്ത ബിശ്വ ശർമ്മ, ഗിരിരാജ് സിംഗ്, മിഥുൻ ചക്രവർത്തി തുടങ്ങിയവർ  ഈ സീസണിൽ ദിവസവും ചീറ്റുന്ന വർഗ്ഗീയ  വിഷത്തിൻ്റെ ഫലമായി ബി ജെ പി യ്ക്കു രാഷ്ട്രീയ അംഗീകാരം പോലും ഇതിനകം  തന്നെ ഇല്ലാതാക്കപ്പെടേണ്ടതായിരുന്നു.  ഒരു കാലത്ത് ഹിന്ദു അഭിമാനം വിളിച്ചോതിക്കൊണ്ടിരുന്ന പാർട്ടി, ഇപ്പോൾ ഇരയുടെ കാർഡ് കളിക്കുന്ന തിരക്കിലാണ്.  ബംഗ്ലാദേശി നുഴഞ്ഞുകയറ്റത്തിൻ്റെ കെട്ടുകഥകൾ ഇന്ത്യയിലെ ഭൂരിപക്ഷം വരുന്ന ഹിന്ദു ജനതയ്ക്ക് അസ്തിത്വ ഭീഷണിയായി അവതരിപ്പിക്കപ്പെടുന്നു.   മുസ്ലീം ആക്രമണ ഭീഷണിയിൽ നിന്ന് അതിജീവനം ഉറപ്പാക്കാൻ എല്ലാ ഹിന്ദുക്കളും ബി.ജെ.പിക്ക് ചുറ്റും അണിനിരക്കാൻ ആവശ്യപ്പെടുന്ന ബി.ജെ.പിയുടെ പുതിയ യുദ്ധവിളിയായി 'ബാണ്ടോഗെ തോ കാട്ടോഗെ' (വിഭജിക്കപ്പെട്ടാൽ നിങ്ങൾ കൊല്ലപ്പെടും) മാറിയിരിക്കുന്നു.  ജാർഖണ്ഡിൽ ഹിമന്ത ബിശ്വ ശർമ്മ മുസ്ലീം നിയമസഭാംഗങ്ങളെയും മന്ത്രിമാരെയും പേരെടുത്ത് പരാമർശിക്കുന്നു, അവരെ അക്രമികളും കൊള്ളക്കാരുമായി അവതരിപ്പിക്കുകയും അവരെ ജാർഖണ്ഡിലെ ഐതിഹാസികങ്ങളായ സിദ്ധോ-കനു, പിതാംബർ-നിലാംബർ, ബിർസ മുണ്ട എന്നിവർക്കെതിരെ പ്രതിഷ്ഠി ക്കുകയും ചെയ്യുന്നു.  ബീഹാറിൽ, ഗിരിരാജ് സിംഗ് ഹിന്ദു 'സ്വാഭിമാൻ' അല്ലെങ്കിൽ ആത്മാഭിമാനത്തിൻ്റെ പേരിൽ ഒരു യാത്ര നടത്തുകയും, സ്വയം പ്രതിരോധിക്കാൻ ത്രിശൂലങ്ങൾ സ്വന്തമാക്കാനും ഉപയോഗിക്കാനും ഓരോ ഹിന്ദു കുടുംബത്തോടും ആവശ്യപ്പെടുകയും ചെയ്യുന്നു. 

മുസ്‌ലീങ്ങളെ  നുഴഞ്ഞുകയറ്റക്കാരും അധിനിവേശക്കാരുമായി ചിത്രീകരിച്ച്  പൈശാചികവൽക്കരിക്കുന്നതിനൊപ്പം, വിയോജിക്കുന്നവരെ 'അർബൻ നക്‌സലുകൾ' എന്ന് നിരന്തരം മുദ്രകുത്തുകയാണ്‌.  ഇന്ത്യൻ ഭരണഘടനയെ സംരക്ഷിക്കുക എന്ന ആവശ്യം   മോദി സർക്കാരിൻ്റെ ഭാഷ്യത്തിൽ  നക്സലിസത്തിൻ്റെ ഏറ്റവും പുതിയ നിർവ്വചനമാക്കി മാറ്റപ്പെട്ടിരിക്കുന്നു.  ജാതി സെൻസസിൻ്റെ അജണ്ട ഏറ്റെടുത്ത് ഭരണഘടനയെ രക്ഷിക്കാൻ ആവശ്യമുയർത്തുന്ന  കോൺഗ്രസും ഇന്ത്യാ മുന്നണിയും 'അർബൻ നക്‌സലുകളെ' പ്രോത്സാഹിപ്പിക്കുകയാണെന്ന്  അവർ ആരോപിക്കുന്നു.   ഹിന്ദു മേൽക്കോയ്മ ഭൂരിപക്ഷവാദം, കോർപ്പറേറ്റ് പ്രീണനം, സ്ഥാപനവൽക്കരിച്ച അഴിമതി, സ്വേച്ഛാധിപത്യ ഭരണം എന്നിവയുടെ അജണ്ടയെ ഇന്ത്യയുടെ 'ദേശീയ താൽപ്പര്യം' എന്ന നിലയിൽ നടപ്പാക്കാനുള്ള ബിജെപിയുടെ പദ്ധതിയാണ് പ്രതിപക്ഷത്തെ തളർത്താനുള്ള ഈ ശ്രമത്തിന് പിന്നിൽ.  ഈ പദ്ധതിയിൽ മഹാരാഷ്ട്രയും ജാർഖണ്ഡും ബിജെപിയെ സംബന്ധിച്ചിടത്തോളം  നിർണായക സംസ്ഥാനങ്ങളാണ്.  മഹാരാഷ്ട്രയിൽ അധികാരം പിടിക്കാൻ ബിജെപി എല്ലാ ഭരണഘടനാ തത്ത്വങ്ങളും ധാർമ്മിക മാനദണ്ഡങ്ങളും ലംഘിച്ചു.  ജാർഖണ്ഡിലും ഹേമന്ത് സോറൻ സർക്കാരിനെ അസ്ഥിരപ്പെടുത്താനും സംസ്ഥാന സർക്കാരിൻ്റെ നയങ്ങളെ തടസ്സപ്പെടുത്താനും ഫെഡറൽ അധികാരങ്ങൾ വെട്ടിച്ചുരുക്കാനും മോദി സർക്കാർ എല്ലാ തന്ത്രങ്ങളും പരീക്ഷിച്ചു.  നിയമസഭാ തെരഞ്ഞെടുപ്പിൽ, മുതിർന്ന ജെഎംഎം നേതാവും മുൻ മുഖ്യമന്ത്രിയുമായ ചമ്പായി സോറനെ ബിജെപിയിൽ ചേർത്തുകൊണ്ട് ജെഎംഎമ്മിൽ നിന്ന് വലിയ കൂറുമാറ്റങ്ങൾ നടത്താൻ പോലും ശ്രമങ്ങൾ നടക്കുന്നു.  ഛത്തീസ്ഗഡിലും ഒഡീഷയിലും വിജയിച്ച് ജാർഖണ്ഡിൽ ബിജെപിക്ക് അധികാരം പിടിക്കാനായാൽ അത് അദാനി ത്രികോണത്തിൻ്റെ പൂർത്തീകരണത്തെയാണ് അടയാളപ്പെടുത്തുക. 

അതുകൊണ്ട് തന്നെ മഹാരാഷ്ട്രയിലെയും ജാർഖണ്ഡിലെയും നിയമസഭാ തെരഞ്ഞെടുപ്പുകളിലും അതിനോടൊപ്പമുള്ള പല സംസ്ഥാനങ്ങളിലെയും ഉപതിരഞ്ഞെടുപ്പുകളിലും വളരെയധികം അപകടസാദ്ധ്യതയുണ്ട്.  അതിനാൽ, സംഘ് ബ്രിഗേഡിൻ്റെ ഹീനമായ  പദ്ധതിയെ  പരാജയപ്പെടുത്താൻ ഇടതുപക്ഷവും ഇന്ത്യാ മുന്നണിയും  ഈ നിർണായക റൗണ്ട് തിരഞ്ഞെടുപ്പ് പോരാട്ടങ്ങളിൽ തങ്ങളുടെ എല്ലാ ശക്തിയും ഊർജ്ജവും ശേഖരിക്കേണ്ടതുണ്ട്.  ജാർഖണ്ഡിലെ സീറ്റ് വിഭജന ക്രമീകരണത്തിന് 81 സീറ്റുകളിലും സമ്പൂർണ്ണ സഖ്യം ഉറപ്പാക്കാൻ കഴിഞ്ഞില്ല എന്നത് ദൗർഭാഗ്യകരമാണ്.  സിപിഐ(എംഎൽ) നാല് സീറ്റിൽ മാത്രമാണ് മത്സരിക്കുന്നത്, 2019ലെ നിയമസഭാ തെരഞ്ഞെടുപ്പിൽ ഇവയിലൊരു മണ്ഡലത്തിൽ ആറാം സ്ഥാനത്തെത്തിയിട്ടും ഈ നാല് സീറ്റുകളിലൊന്നിൽ  ജെഎംഎം സ്ഥാനാർത്ഥിയെ നിർത്തി.  അസമിലും, 2019 ൽ ഉണ്ടായിരുന്ന അസംബ്ലി തെരഞ്ഞെടുപ്പ് ധാരണയിൽനിന്നും കോണ്ഗ്രസ്സ് പുറകോട്ട് പോവുകയും, ബെഹാലി ഉപതെരഞ്ഞെടുപ്പിൽ സി പി ഐ എം എൽ  സ്ഥാനാർത്ഥിക്കെതിരെ സ്വന്തം സ്ഥാനാർത്ഥിയെ നിർത്തുകയും ചെയ്തിരിക്കുന്നു. അതും ബിജെപിയിൽ നിന്ന് കൂറുമാറിയ ഒരാളെ പുനരധിവസിപ്പിച്ചുകൊണ്ട്.  എന്നിരുന്നാലും, പശ്ചിമ ബംഗാളിൽ ഒരു നല്ല സൂചന  ഉയർന്നുവന്നിട്ടുണ്ട്, സംസ്ഥാനത്തിൻ്റെ രാഷ്ട്രീയ ചരിത്രത്തിൽ ആദ്യമായി  ഉപതെരഞ്ഞെടുപ്പ് നടക്കുന്ന ആറ് മണ്ഡലങ്ങളിൽ ഒന്നിൽ സിപിഐ (എം ) സിപിഐ (എംഎൽ) ന് പിന്തുണ നൽകിയിരിക്കുന്നു.  ഇടതുപക്ഷത്തിൻ്റെ രാഷ്ട്രീയ പുനരുജ്ജീവനം ത്വരിതപ്പെടുത്തിക്കൊണ്ട് പശ്ചിമ ബംഗാളിലെ രാഷ്ട്രീയ സന്തുലിതാവസ്ഥയെ മാറ്റാൻ ഇടതുപക്ഷത്തിൻ്റെ വിശാലവും ഊർജജസ്വലവുമായ ഐക്യം കാലഘട്ടത്തിൻ്റെ ആവശ്യമാണ്.  സംഘ് ബ്രിഗേഡിനും അതിൻ്റെ ഫാസിസ്റ്റ് ആക്രമണത്തിനും ശക്തമായ മറ്റൊരു പ്രഹരം ഏൽപ്പിക്കാൻ നവംബറിലെ തിരഞ്ഞെടുപ്പ് നൽകിയ അവസരം ഇന്ത്യയിലെ ജനങ്ങൾ പരമാവധി പ്രയോജനപ്പെടുത്തട്ടെ.

 വൈവാഹിക ബലാത്സംഗത്തെക്കുറിച്ചുള്ള കേന്ദ്ര ഗവൺമെൻ്റിൻ്റെ നിലപാട് അപലപനീയം :
വിവാഹത്തിലെ അക്രമത്തെ പ്രതിരോധിക്കുക 

- മൈത്രേയി കൃഷ്ണൻ
 ( Liberation മാസിക, Nov 2024 ലക്കം )    

'ബലാത്സംഗം' എന്നതിൻ്റെ നിർവചനത്തിൽ വൈവാഹിക ബലാത്സംഗം ഒഴിവാക്കുന്നതിനെ ചോദ്യം ചെയ്യുന്ന  ഒരു ഹരജി സുപ്രീം കോടതി ഇപ്പോൾ പരിഗണിക്കുകയാണ്.  വൈവാഹിക ബലാത്സംഗം കുറ്റകരമാക്കാത്ത ചുരുക്കം ചില രാജ്യങ്ങളിലൊന്നാണ് ഇന്ത്യ.  ഇന്ത്യൻ ശിക്ഷാനിയമത്തിലും ഇപ്പോൾ ഭാരതീയ ന്യായ് സംഹിതയിലും 'ബലാത്സംഗം' എന്ന പ്രസക്തമായ വകുപ്പ് ബലാത്സംഗ കുറ്റത്തിന് ഒരു അപവാദം നൽകുന്നുണ്ട്  - "ഒരു പുരുഷൻ സ്വന്തം ഭാര്യയുമായി ലൈംഗിക ബന്ധത്തിലേർപ്പെടുന്നത് സമ്മതത്തോടെയല്ലെങ്കിൽപ്പോലും  ഭാര്യയ്ക്കു പതിനെട്ട് വയസ്സ് പൂർത്തിയായിട്ടുണ്ടെങ്കിൽ അത് ബലാത്സംഗമല്ല. 

ഇന്ത്യൻ പീനൽ കോഡിൽ കാണുന്ന ബലാത്സംഗത്തിനുള്ള ഈ അപവാദം, പലപ്പോഴും "ഹെയ്‌ലിൻ്റെ തത്വം" എന്ന് വിളിക്കപ്പെടുന്നതിനെയാണ് ഓർമ്മിപ്പിക്കുന്നത് . ഒരു ബ്രിട്ടീഷ് നിയമജ്ഞൻ മാത്യു ഹെയ്ൽ നടത്തിയ ഒരു പ്രസ്താവനയെക്കുറിച്ച് കോടതിയിൽ പരാമർശമുണ്ടായത് ഇങ്ങനെയായിരുന്നു.  "എന്നാൽ ഭർത്താവ് സ്വയം ബലാത്സംഗം ചെയ്തതിന് കുറ്റക്കാരനാകാൻ കഴിയില്ല.  നിയമാനുസൃതമായ ഭാര്യ, അവരുടെ പരസ്പര വൈവാഹിക സമ്മതവും ഉടമ്പടിയും പ്രകാരം  ഭർത്താവിന് ഈ രീതിയിൽ  സ്വയം സമർപ്പിതയാണ് എന്നതുകൊണ്ട് ,ആ സമ്മതം അവൾക്ക് പിൻവലിക്കാൻ കഴിയില്ല". 

മൂന്ന് പുതിയ ക്രിമിനൽ നിയമങ്ങൾ ഇന്ത്യൻ നിയമങ്ങളുടെ അപകോളനിവൽക്കരണത്തെ പ്രതിനിധീകരിക്കുന്നതായും സ്ത്രീകൾക്കും കുട്ടികൾക്കുമെതിരായ കുറ്റകൃത്യങ്ങൾക്ക് അവ പ്രഥമ പരിഗണന നൽകുമെന്നും, ഭാരതീയ ന്യായ സൻഹിത അവതരിപ്പിച്ചുകൊണ്ട് ആഭ്യന്തര മന്ത്രി അമിത് ഷാ പറഞ്ഞിരുന്നു.  എന്നിരുന്നാലും, ഇപ്പോൾ മിക്കവർക്കും അറിയാവുന്നതുപോലെ, പുതിയ നിയമങ്ങൾ ഭൂരിഭാഗം കൊളോണിയൽ നിയമങ്ങളെയും ഫലത്തിൽ  നിലനിർത്തുകയാണ് ചെയ്യുന്നത് . മാത്രമല്ല,  പുതുതായി ചേർത്ത ചില വ്യവസ്ഥകളുടെ രൂപത്തിൽ അതിൻ്റെ ദാക്ഷിണ്യരഹിതമായ ഉദ്ദേശ്യം മാത്രം  നിർമ്മിച്ചുറപ്പിക്കുകയും ചെയ്യുന്നു.  അതിശയകരമെന്നു പറയട്ടെ, IPC പ്രകാരമുള്ള ബലാത്സംഗ നിയമത്തിലെ ഈ അപവാദം, ഭാരതീയ ന്യായ സംഹിതയിലും   തുടരുകയാണ്. 

വൈവാഹിക ബലാത്സംഗത്തിനുള്ള ഈ അപവാദം ആദ്യം വെല്ലുവിളിക്കപ്പെട്ടത് ഡെൽഹി ഹൈക്കോടതിയുടെ മുമ്പാകെയാണ്, അത് കേസ്‌ കേട്ട  ബെഞ്ചിലെ  ജഡ്ജിമാരുടെ  വിധി പ്രസ്താവം                      ഐകകണ്ഠേനയുള്ളതാ യിരുന്നില്ല. ജഡ്ജിമാരിൽ ഒരാളുടെ വിധിന്യായത്തിൽ  ഇത് ഭരണഘടനാ വിരുദ്ധമാണെന്നു ചൂണ്ടിക്കാട്ടിയപ്പോൾ, മറ്റേ ജഡ്ജി അത് ശരിവച്ച് ആണ് വിധിയെഴുതിയത്. എന്നാൽ, രണ്ട് ജഡ്ജിമാരും  സുപ്രീം കോടതിയിൽ അപ്പീൽ നൽകാൻ അനുമതി നൽകിയിരുന്നു. അതിനാൽ,  സുപ്രീം കോടതി  ഇപ്പോൾ വാദം കേൾക്കുകയാണ്.

കേന്ദ്ര ഗവൺമെൻ്റ് സുപ്രീം കോടതിയിൽ  ഫയൽ ചെയ്ത മറുപടി പ്രകാരം, "ഒരു വിവാഹ സ്ഥാപനത്തിൽ" "ഒരാളിൽ നിന്ന് ലൈംഗികതയ്ക്കുള്ള  ന്യായമായ അനുവാദവും അഭിഗമ്യതയും  ഉണ്ടായിരിക്കണം" എന്ന  പ്രതീക്ഷ തുടർച്ചയായി നിലനിൽക്കുന്നതിനാൽ ,  "ദാമ്പത്യത്തിൽ  ബലാൽസംഗക്കുറ്റത്തെ    ഒഴിവാക്കൽ ആവശ്യ"മെന്ന നിലപാട് ആണ് സ്വീകരിച്ചത്. 

" സമ്മതമില്ലാത്ത ലൈംഗിക ബന്ധത്തിന്  ശ്രമിക്കുന്ന" അപരിചിതനെപ്പോലെ കണക്കാക്കാൻ ആവാത്തയാൾ ആണ് ഭർത്താവ് എന്നും, തന്മൂലം   "വൈവാഹിക മണ്ഡലത്തിലെ പരസ്പര സമ്മതമില്ലാതെയുള്ള ലൈംഗിക ബന്ധത്തെ ഗുണപരമായി വേർതിരിക്കാൻ" "ഈ ബാധ്യതകളും പ്രതീക്ഷകളും" മതിയായ അടിസ്ഥാനമാണെന്നും  അത് പ്രസ്താവിക്കുന്നു. 

  മേൽസൂചിപ്പിച്ച ഈ പ്രതീക്ഷകൾ  നിലനിൽക്കേത്തന്നെ  ഭാര്യയുടെ ഇഷ്ടത്തിന് വിരുദ്ധമായി ലൈംഗിക ബന്ധത്തിൽ ഏർപ്പെടുത്താൻ ഭർത്താവിന് അത് അർഹത നൽകുന്നില്ല എന്ന ലഘുവായ ഇളവ് നൽകുമ്പോഴും ,  "വൈവാഹിക ബന്ധത്തിൻ്റെ കാര്യത്തിൽ താരതമ്യപ്പെടുത്തുമ്പോൾ സമ്മതം എന്ന ആശയം വ്യത്യസ്തമായിരിക്കും" എന്ന് പ്രസ്താവിച്ചതിലൂടെ സമ്മതം എന്ന ആശയത്തെ തന്നെ അത് നേർപ്പിക്കുന്നു.  വിവാഹ സ്ഥാപനത്തിന് പുറത്തുള്ള മറ്റേതെങ്കിലും ബന്ധത്തിന്റെതിൽ നിന്ന്‌ വ്യത്യസ്തമായി  വിവാഹത്തിനുള്ളിൽ സമ്മതം എന്ന ആശയത്തിന് അർത്ഥം നഷ്ടപ്പെടുന്ന  നിലപാട് ഫലത്തിൽ ഹേയ്ലിൻ്റെ തത്വത്തിൻ്റെ ആവർത്തനമായി മാത്രമേ മനസ്സിലാക്കാൻ കഴിയൂ. 

"വിവാഹ സ്ഥാപനം സംരക്ഷിക്കുന്നതിന്" മുൻഗണന നൽകിക്കൊണ്ട് ഗവൺമെൻ്റിൻ്റെ നിലപാട് ഒരു സ്ത്രീയുടെ  ശാരീരിക അഖണ്ഡതയ്ക്കും സ്വയംനിർണ്ണയാധികാരത്തിനും ഉള്ള അവകാശത്തെ അവഹേളിക്കുന്നു. അങ്ങനെ വരുമ്പോൾ,  വിവാഹത്തെ സർക്കാർ കാണുന്നത് സ്ത്രീയുടെ സ്വന്തം ശരീരത്തിന് മേലുള്ള അധികാരത്തെ ഇല്ലാതാക്കുകയും അവളെ ഭർത്താവിന് സർവ്വാധികാരം ഉള്ള വെറും വസ്തു  ആയി കണക്കാക്കുകയും ചെയ്യുന്നു.  ശാരീരിക അഖണ്ഡതയ്ക്കുള്ള ഒരു സ്ത്രീയുടെ അവകാശം നഷ്‌ടപ്പെടുന്നത്, വിവാഹമെന്ന  സ്ഥാപനത്തെ സംരക്ഷിക്കാൻ  കൊടുക്കേണ്ട ആവശ്യമായ വിലയാണെന്ന് കരുതുന്ന ഒരു "അനുബന്ധ നഷ്ടമായി"ട്ടാണ്   (കൊളാറ്ററൽ ഡാമേജ്‌) ഈ സമീപനത്തിലൂടെ കണക്കാക്കപ്പെടുന്നത്.  ലൈംഗിക അതിക്രമത്തെ അടിസ്ഥാനമാക്കിയുള്ള ഏതൊരു "സ്ഥാപനവും" ഇത് അംഗീകരിക്കേണ്ടതുണ്ട് എന്ന യുക്തിയാണ് അതിൽ അന്തർഭവിച്ചിരിക്കുന്നത്. ഒരു വ്യക്തിയ്ക്കു  മറ്റൊരാളുടെ ലൈംഗികാക്രമണതിന്നെതിരെ യുള്ള  സംരക്ഷണം ഒഴിവാക്കൽ  ആവശ്യമില്ലാത്തതും,  എന്നാൽ നിയമങ്ങൾ  കൂടുതൽ സമത്വം വളർത്തിയെടുക്കുന്ന വിധത്തിൽ അവലോകനം ചെയ്യപ്പെടേണ്ടതുമാണ്. എന്നിട്ടും  സർക്കാരിൻ്റെ നിലപാട് സമത്വം എന്ന ആശയത്തെ അവഗണിച്ചുവെന്നാണ് മനസ്സിലാക്കേണ്ടത് .              2007-ൽ, സ്ത്രീകൾക്കെതിരായ വിവേചനം ഇല്ലാതാക്കുന്നതിനുള്ള യുഎൻ കമ്മിറ്റി, "സ്ത്രീകൾ അനുഭവിക്കുന്ന ലൈംഗികാതിക്രമത്തിൻ്റെ യാഥാർത്ഥ്യങ്ങൾ പ്രതിഫലിപ്പിക്കുന്നതായിരുന്നു.  ബലാത്സംഗത്തിൻ്റെ നിർവചനത്തിൽ നിന്ന് വൈവാഹിക ബലാത്സംഗത്തെ ഒഴിവാക്കുന്നതിന് ഹേതുവായ ഇന്ത്യൻ  പീനൽ കോഡിലെ നിർവ്വചനം വിപുലീകരിക്കണമെന്ന് അത്   ശുപാർശ ചെയ്തു.  …” ദേശീയ കുടുംബാരോഗ്യ സർവേ 5 (2019-21) 18-49 വയസ് പ്രായമുള്ള വിവാഹിതരായ സ്ത്രീകളിൽ ലൈംഗികാതിക്രമം അനുഭവിച്ചിട്ടുള്ളവരിൽ 83 ശതമാനം പേർ നിലവിലെ ഭർത്താവിനെയും  13 ശതമാനം പേർ മുൻ ഭർത്താവിനെയും കുറ്റവാളികളായി ചൂണ്ടിക്കാട്ടി. 

വൈവാഹിക ബലാത്സംഗത്തിനുള്ള ഇളവ് നീക്കം ചെയ്യാൻ ശുപാർശ ചെയ്യുക മാത്രമല്ല, പരാതിക്കാരിയും  ഭർത്താവും  തമ്മിലുള്ള ബന്ധത്തിൽ പരാതിക്കാരി ലൈംഗിക പ്രവർത്തനത്തിന് സമ്മതം നൽകിയിട്ടുണ്ടോ എന്ന അന്വേഷണത്തിന് പ്രസക്തിയില്ലെന്ന്കൂടി  നിയമ ഭേദഗതികൾ വ്യക്തമാക്കണമെന്ന് ജസ്റ്റിസ് വർമ്മ കമ്മിറ്റി റിപ്പോർട്ട് നിർദ്ദേശിക്കുന്നു.  .  വൈവാഹിക ബലാത്സംഗം ഒരു കുറ്റകൃത്യമായി അംഗീകരിക്കപ്പെടുന്നിടത്ത് പോലും, ജഡ്ജിമാർ അതിനെ മറ്റ് ബലാത്സംഗങ്ങളെ അപേക്ഷിച്ച് ഗൗരവം കുറഞ്ഞതായി വീക്ഷിക്കുന്നതിനുള്ള അപകടസാദ്ധ്യതയുണ്ടെന്ന് കമ്മിറ്റി തിരിച്ചറിഞ്ഞു, ഇത് കൂടുതൽ ശിക്ഷാവിധികളിലേക്ക് നയിക്കുന്നു.  ദക്ഷിണാഫ്രിക്കയിൽ നടപ്പിലാക്കിയ പരിഷ്‌കാരങ്ങൾക്ക് സമാനമായി, ബലാത്സംഗത്തിനുള്ള കുറഞ്ഞ ശിക്ഷയെ ന്യായീകരിക്കുന്ന ഒരു ലഘൂകരണ ഘടകമായി വൈവാഹിക ബന്ധത്തെ കണക്കാക്കരുതെന്ന്  വ്യക്തമായും നിയമത്തിൽ പ്രസ്താവിത മായിരിക്കണമെന്ന് കമ്മിറ്റി  ശുപാർശ ചെയ്തു. 

സ്ത്രീയെ താഴ്ന്ന പദവിയിൽ  നിർത്തുന്ന മനുസ്മൃതിയിൽ വിശ്വസിക്കുന്ന ഒരു ഗവൺമെൻ്റാണ് ഇതെന്ന കേന്ദ്രസർക്കാരിൻ്റെ നിലപാടിൽ അതിശയിക്കാനില്ല, "സദ്‌ഗുണവതിയായ ഒരു ഭാര്യ തൻ്റെ ഭർത്താവ് എങ്ങനെ  പെരുമാറിയാലും അവനെ ഒരു ദൈവത്തെപ്പോലെ നിരന്തരം സേവിക്കണം.  മോശപ്പെട്ട രീതിയിലും യഥേഷ്ടവും സ്വന്തം കാമപൂരണത്തിൽ  മുഴുകുന്നവനും  നല്ല ഗുണങ്ങളൊന്നും ഇല്ലാത്തവനും ആണെങ്കിലും അതിൽ മാറ്റം പാടില്ല ”.  ബ്രാഹ്മണ പുരുഷാധിപത്യത്തിൻ്റെ അതേ ശക്തികൾ തന്നെ പാരമ്പര്യത്തിൻ്റെ പേരിൽ ഹിന്ദു കോഡ് ബില്ലിനെ എതിർത്തു. 

ഈ അവസരത്തിൽ, ഹിന്ദു കോഡ് ബില്ലിൻ്റെ പശ്ചാത്തലത്തിൽ പറഞ്ഞ ഡോ. അംബേദ്കറുടെ വാക്കുകൾ ഓർക്കേണ്ടത് അത്യാവശ്യമാണ്.  "ഹിന്ദു സമൂഹത്തിൻ്റെ ആത്മാവായ വർഗ്ഗവും വർഗ്ഗവും തമ്മിലുള്ള, ലൈംഗികതയും ലൈംഗികതയും തമ്മിലുള്ള അസമത്വത്തെ  തൊടാതെ   സാമ്പത്തിക പ്രശ്‌നങ്ങളുമായി മാത്രം  ബന്ധപ്പെട്ട് നിയമനിർമ്മാണം നടത്തുന്നവർ  നമ്മുടെ ഭരണഘടനയെ പ്രഹസനമാക്കുകയും ചാണകക്കൂമ്പാരത്തിൽ കൊട്ടാരം പണിയുകയുമാണ് ചെയ്യുന്നത് " 

സുപ്രീം കോടതി ഇപ്പോൾ ഒരു  പരീക്ഷണഘട്ടത്തിലാണ് - അത് ഭരണഘടനാപരമായ ധാർമ്മികത പിന്തുടരുകയും  ഭരണഘടനയ്ക്ക് കീഴിൽ ഉറപ്പുനൽകുന്ന സമത്വ വാഗ്ദാനം ഉയർത്തിപ്പിടിക്കുകയും ചെയ്യുമോ, അതോ പാരമ്പര്യത്തിൻ്റെ പേര് പറഞ്ഞ് അസമത്വം നിലനിർത്തുന്നതിനും അക്രമത്തെ സ്ഥാപനവത്കരിക്കുന്നതിനുമുള്ള കെണിയിൽ അകപ്പെടുമോ?

 ജി.എൻ. സായിബാബ:
"ജനാധിപത്യം" രക്തസാക്ഷിയാക്കിയ ഒരു ജനാധിപത്യവാദി 

 ML അപ്‌ഡേറ്റ് വോളിയം. 27, നമ്പർ 44 (22-28

ഒക്ടോബർ 2024)





 ഒരു ജനാധിപത്യസംവിധാനത്താൽ രക്തസാക്ഷിയാക്കപ്പെട്ട പ്രൊഫസർ ജി എൻ സായിബാബ 2024 ഒക്‌ടോബർ 12 ന് വൈകുന്നേരം എട്ട് മുപ്പത്തിയാറിന് അന്ത്യശ്വാസം വലിച്ചു. പ്രവർത്തനം നിലച്ചിരുന്ന അദ്ദേഹത്തിന്റെ ഹൃദയത്തെ പുനരുജ്ജീവിപ്പിക്കാൻ ഡോക്ടർമാർ തീവ്രമായി ശ്രമിച്ചുവെങ്കിലും അത് ഫലം കണ്ടില്ല. സായിബാബയ്ക്ക് 57 വയസ്സായിരുന്നു. പിത്തസഞ്ചിയിലെ കല്ലുകൾ നീക്കം ചെയ്തതിനുശേഷം ഉണ്ടാകുന്ന സങ്കീർണ്ണതകൾ മൂലമാണ് അദ്ദേഹം മരിച്ചത് - അപൂർവ്വമായി മാത്രം ജീവൻ അപകടത്തിലാക്കുന്ന ഒരു സാധാരണ ഓപ്പറേഷൻ ആയിരുന്നു അത്. എന്നാൽ, സായിബാബ ഓപ്പറേഷൻ തിയറ്ററിൽ പ്രവേശിച്ചിരുന്നത് അത്ര സാധാരണമായ ഒരു സാഹചര്യത്തിലായിരുന്നില്ല . 90 % അംഗവൈകല്യം ഉണ്ടായിരുന്ന സായിബാബയുടെ ശരീരം ഒരു ദശാബ്ദക്കാലത്തെ അന്യായമായ കരാഗ്രഹ ജീവിതത്തിൽ അത്യന്തം കഠിനവും പീഡകൾ നിറഞ്ഞതുമായ സാഹചര്യങ്ങളിൽ കൂടുതൽ ദുർബ്ബലമായിരുന്നു. സഹ രാഷ്ട്രീയ തടവുകാരായ ഫാദർ സ്റ്റാൻ സ്വാമി, പാണ്ഡു നരോട്ടെ, ജിയാ ലാൽ എന്നിവരെപ്പോലെ സായിബാബ കസ്റ്റഡിയിൽ മരിച്ചിട്ടില്ല. പക്ഷേ, ജയിൽവാസത്തിൻ്റെ കെടുതികളാണ് അദ്ദേഹത്തിൻ്റെ മരണത്തെ വേഗത്തിലാക്കിയത് എന്നതിൽ സംശയമില്ല. അദ്ദേഹത്തിന്റെ ശരീരത്തെ ക്രൂരമായി പീഡിപ്പിക്കാൻ ക്രിമിനൽ നീതിന്യായ വ്യവസ്ഥയെ എങ്ങനെയാണ് ഉപയോഗിച്ചത് എന്നതിൻ്റെ വിശദാംശങ്ങളിലേക്ക് ആഴ്ന്നിറങ്ങുന്നതിന് മുമ്പ്, ആ വികലാംഗ ശരീരത്തിൽ സ്ഥിതി ചെയ്യുന്ന മനസ്സ് ഭരണകൂടത്തിന് എങ്ങനെ ഭീഷണിയായി എന്ന് ഓർക്കാം. മുൻ ഡെൽഹി യൂണിവേഴ്സിറ്റി പ്രൊഫസറായ സായിബാബ, നിയമവിരുദ്ധ പ്രവർത്തനങ്ങൾ (തടയൽ) നിയമം , 1967 ലെ സെക്ഷൻ 18 പ്രകാരം, മറ്റ് അഞ്ച് പേർക്കൊപ്പവും മറ്റ് ക്രിമിനൽ വകുപ്പുകൾക്കൊപ്പവും 2014 ൽ "സർക്കാരിനെതിരെ യുദ്ധം ചെയ്യാൻ ഗൂഢാലോചന നടത്തിയതിന്" അറസ്റ്റ് ചെയ്യപ്പെട്ടു. അദ്ദേഹത്തിൻ്റെ "മാവോയിസ്റ്റ് ബന്ധങ്ങളും" പലപ്പോഴും ഉയർന്നുവന്നിരുന്നു. ഓപ്പറേഷൻ ഗ്രീൻ ഹണ്ടിനെയും മറ്റ് നടപടികളെയും അദ്ദേഹം പരസ്യമായി എതിർത്തു എന്നതാണ് അദ്ദേഹത്തിൻ്റെ യഥാർത്ഥ “കുറ്റം”, ദളിതരും ആദിവാസികളും ഭരണകൂട അടിച്ചമർത്തലുകൾ നേരിടുന്നതിൻ്റെ കാരണങ്ങളെക്കുറിച്ച് , അതുപോലെ തന്നെ ഇന്ത്യയ്ക്കുള്ളിൽ അടിച്ചമർത്തപ്പെട്ട ദേശീയതകളേക്കുറിച്ച് സംസാരിക്കുകയും ഇരകൾക്കുവേണ്ടി വാദിക്കുകയും ചെയ്തു എന്നതാണ്. 2014-ൽ ഭാരതീയ ജനതാ പാർട്ടി (ബിജെപി) അധികാരത്തിൽ വന്നതിനുശേഷം, മനുഷ്യാവകാശ പ്രവർത്തകർ മുതൽ അഭിഭാഷകർ വരെ, പത്രപ്രവർത്തകർ മുതൽ വിദ്യാർത്ഥികൾ വരെ - ജനാധിപത്യപരവും പുരോഗമനപരവുമായ അവകാശങ്ങൾക്ക് വേണ്ടി പോരാടുന്നതിലുള്ള ഉറച്ച ബോദ്ധ്യങ്ങളുടെ പേരിൽ പീഡിപ്പിക്കപ്പെടുന്ന ആളുകളുടെ പട്ടിക അതിവേഗം വളർന്നു. 2018ലെ ഭീമാ കൊറേഗാവ് സംഭവവുമായി ബന്ധപ്പെട്ട അറസ്റ്റും 2020ൽ സിഎഎയ്‌ക്കെതിരായ പ്രതിഷേധവും തുടങ്ങി ആക്ടിവിസ്റ്റ് ടീസ്റ്റ സെതൽവാദിൻ്റെയും മാദ്ധ്യമപ്രവർത്തകൻ മുഹമ്മദ് സുബൈറിൻ്റെയും അറസ്റ്റുകൾ വരെ, അധികാരത്തോട് സത്യം പറയുകയും അവരുടെ നുണകളും കൊള്ളരുതായ്മകളും ശക്തമായി തുറന്നുകാട്ടുകയും ചെയ്യുന്ന ഏതൊരു വ്യക്തിയെയും ജെയിലിൽ അടയ്ക്കാനാണ് നിലവിലെ ഭരണകൂടം ശ്രമിക്കുന്നത്. നിയമവിരുദ്ധ പ്രവർത്തനങ്ങൾ (തടയൽ) നിയമം, (UAPA) 1967, ചാർത്തപ്പെട്ടാൽ ജാമ്യം ഒരു അപൂർവ്വ സാദ്ധ്യതയും ജെയിൽവാസം ചട്ടവുമാണ്. വിയോജിപ്പിന്റെ സ്വരങ്ങളെ നിശ്ശബ്ദമാക്കുന്നതിനുള്ള ഏറ്റവും സൗകര്യപ്രദമായ തന്ത്രമായി അത് ഉയർന്നുവന്നിരിക്കുന്നു. "മാവോയിസ്റ്റ്" എന്ന ലേബലിൻ്റെ ഉപയോഗവും പതിവായിരിക്കുന്നു. ബി.ജെ.പി അധികാരത്തിൽ വരുന്നതിന് തൊട്ടുമുമ്പ് 2014 മെയ് മാസത്തിലും , 2013 ലെ മറ്റ് രണ്ട് അറസ്റ്റുകളുമായി ബന്ധപ്പെട്ട് (പ്രശാന്ത് റാഹിയും ഹേം മിശ്രയും) ജിഎൻ സായിബാബ അറസ്റ്റിലായിരുന്നു. അവരുടെ അറസ്റ്റുകൾ ബി.ജെ.പിയുടെ ഉയർച്ചയ്ക്ക് മുമ്പുള്ള വർഷങ്ങളിൽ ഇഴഞ്ഞുനീങ്ങുന്ന സ്വേച്ഛാധിപത്യത്തിൻ്റെ അടയാളമായിരുന്നുവെങ്കിൽ, പിന്നീട് ഇത്തരം നടപടികൾ ഹിന്ദുത്വ ഉയർച്ചയെ മുൻനിർത്തിയും കൂടുതൽ സുഗമമാക്കപ്പെട്ടതുമായ ഒരു പ്രക്രിയയുടെ ഭാഗമായി. തീർച്ചയായും, 1967 മുതൽ UAPA പ്രാബല്യത്തിൽ ഇരിക്കവേ 2004-ലെ UAPA ഭേദഗതി നിയമം വഴി 2004-ൽ മാത്രമാണ് തീവ്രവാദ പ്രവർത്തനങ്ങളെ ശിക്ഷിക്കുന്നതിനുള്ള ഒരു അദ്ധ്യായം പാർലമെൻ്റ് ഉൾപ്പെടുത്തിയത് . കോൺഗ്രസ് നേതൃത്വത്തിലുള്ള സംയുക്ത പുരോഗമന സഖ്യത്തിന് (UPA) കീഴിലാണ് ആ നിയമം പാസ്സാക്കിയത്. 2004-ൽ അധികാരത്തിൽ വന്ന ഗവൺമെൻ്റ്, 2004, 2008, 2013 വർഷങ്ങളിൽ കാര്യമായ ഭേദഗതികളിലൂടെ യു എ പി എ നിയമത്തിലെ വകുപ്പുകളെ കൂടുതൽ കർക്കശമാക്കുകയായിരുന്നു. യുഎപിഎ പ്രകാരം ഒരിക്കൽ തടവിലായ ജിഎൻ സായിബാബയുടെ ശരീരവും മനസ്സും ക്രിമിനൽ നീതിന്യായ വ്യവസ്ഥയുടെ മുഴുവൻ ശക്തിയേയും നേരിട്ടു. പരമാവധി ക്രൂരമായ സാഹചര്യങ്ങളിലായാൽപ്പോലും അദ്ദേഹത്തെ തടവിലാക്കാനുള്ള ഒരു ശ്രമവും ഭരണകൂടം ഒഴിവാക്കിയില്ല. ഗഡ്ചിരോളി സെഷൻസ് കോടതി (2017, 2022) ഒന്നല്ല രണ്ടു തവണയാണ് സായിബാബയെ ജീവപര്യന്തം തടവിന് ശിക്ഷിച്ചത്. എന്നാൽ സെഷൻസ് കോടതി നടത്തിയ നടപടിക്രമങ്ങളിലെ പിഴവുകളുടെ അടിസ്ഥാനത്തിൽ 2022-ൽ ബോംബെ ഹൈക്കോടതി അദ്ദേഹത്തെ കുറ്റവിമുക്തനാക്കിയതോടെ ഭരണകൂടത്തിന്റെ പദ്ധതികൾ തകരുമെന്ന ഭീഷണി നേരിട്ട പ്പോഴാണ് ഭരണകൂടം അതിൻ്റെ കൊമ്പുകൾ പൂർണ്ണമായും പുറത്തുകാട്ടിയത്. ജനാധിപത്യത്തിന്റെ എല്ലാ നാട്യങ്ങളും മാറ്റിവച്ച്, അദ്ദേഹത്തെ ജെയിലഴികൾക്ക് പിന്നിൽ നിർത്താൻ സ്റ്റേറ്റ് തീവ്രമായി ശ്രമിച്ചു. 2022-ൽ ബോംബെ ഹൈക്കോടതിയുടെ ഡിവിഷൻ ബെഞ്ച് അദ്ദേഹത്തെ കുറ്റവിമുക്തനാക്കിയതിന് ശേഷം മണിക്കൂറുകൾക്കുള്ളിൽ, ഹൈക്കോടതിയുടെ ഉത്തരവിനെ ചോദ്യം ചെയ്ത് മഹാരാഷ്ട്ര സർക്കാർ സുപ്രീം കോടതിയിൽ ഹർജി നൽകി. പിന്നീടുണ്ടായത് അടിയന്തരാവസ്ഥയിലേതിനു സമാനമായ അസംബന്ധമായ കരുനീക്കങ്ങൾ ആയിരുന്നു. സോളിസിറ്റർ ജനറൽ തുഷാർ മേത്തയാണ് ആദ്യം സമീപിച്ചത് ചീഫ് ജസ്റ്റിസ് യു.യു. ലളിതിൻ്റെ ബെഞ്ചിനെ ആയിരുന്നു. എന്നാൽ അന്നേദിവസം കോടതി നേരത്തെ തന്നെ ദൈനംദിന നടപടികൾ പൂർത്തിയാക്കിയിരുന്നു. തുടർന്ന് മേത്ത ജസ്റ്റിസ് ഡി.വൈ. ചന്ദ്രചൂഡിൻ്റെ ബെഞ്ചിൽ എത്തി. ഹൈക്കോടതി ഉത്തരവ് സ്‌റ്റേ ചെയ്യണമെന്ന ആവശ്യം അവിടെയും സുപ്രീം കോടതി നിരസിച്ചെങ്കിലും, സിജെഐക്ക് മുമ്പാകെ നേരത്തേ വാദം കേൾക്കാൻ അപേക്ഷിക്കാൻ അനുമതി നൽകി. തിങ്കളാഴ്ച കേസ് ലിസ്റ്റ് ചെയ്യാമെന്ന് ബെഞ്ച് ചൂണ്ടിക്കാട്ടി, എന്നാൽ തിങ്കളാഴ്ച കേസ് പരിഗണിച്ചാലും കുറ്റവിമുക്തനാക്കിയ ഉത്തരവ് സ്റ്റേ ചെയ്യില്ലെന്ന് വ്യക്തമായി ചൂണ്ടിക്കാട്ടിയിരുന്നു. എന്നാൽ അസാധാരണമായ ഒരു വഴിത്തിരിവിൽ ചീഫ് ജസ്റ്റിസ് ലളിതിന്റെ അദ്ധ്യക്ഷതയിൽ ജസ്റ്റിസുമാരായ ബേല ത്രിവേദിയും എം.ആർ.ഷായും ഉൾപ്പെട്ട ബെഞ്ച് തിടുക്കത്തിൽ ഒരു പ്രത്യേക ശനിയാഴ്ച വാദം കേൾക്കൽ നടത്തി. നടപടിക്രമങ്ങളിലെ പിഴവുകളിൽ മാത്രം ശ്രദ്ധ കേന്ദ്രീകരിക്കുന്നതിൽ ഹൈക്കോടതിക്ക് തെറ്റുപറ്റിയെന്നും , അതിനാൽ കേസിൻ്റെ മെറിറ്റ് തെറ്റായി അവഗണിച്ചെന്നും പ്രത്യേക ബെഞ്ച് വിലയിരുത്തി. തുടർന്ന് അതിൻ്റെ അനുമതിയും യോഗ്യതയും അടിസ്ഥാനമാക്കി കേസ് കേൾക്കാൻ പുതിയ ഹൈക്കോടതി ബെഞ്ചിനോട് ആവശ്യപ്പെട്ടു. ഒരു വ്യക്തിയുടെ "മസ്തിഷ്കം" "തീവ്രവാദവുമായി ബന്ധപ്പെട്ട കുറ്റകൃത്യങ്ങൾ ചെയ്യുന്നതിൻ്റെ ഏറ്റവും അവിഭാജ്യ ഘടകമാണ്" എന്ന് സുപ്രീം കോടതി ബെഞ്ച്, അവരുടെ നിരീക്ഷണങ്ങളിൽ എടുത്തു പറഞ്ഞു. പ്രൊഫസർ സായിബാബയെപ്പോലുള്ള വികലാംഗനായ മുതിർന്ന പൗരൻ്റെ വീട്ടുതടങ്കൽ കൊണ്ട് മാത്രം അവർക്ക് തൃപ്തി വരുമായിരുന്നില്ലെന്നതിനാൽ അദ്ദേഹത്തെ അവർ ജയിലിലേക്ക് തിരിച്ചയച്ചു. സുപ്രീം കോടതിയുടെ ദൗർഭാഗ്യകരമായ വാക്കുകൾ വെളിപ്പെടുത്തിയത് , ഭരണകൂടം വിമതരെ രാഷ്ട്രീയ പീഡനത്തിന് വിധേയമാക്കുന്നതിനു പിന്നിലെ സത്യമായിരുന്നു. ജനാധിപത്യപരവും മാനുഷികവും നീതിയുക്തവുമായ ഒരു സാമൂഹിക ക്രമത്തിൻ്റെ വിത്തുകൾ വഹിക്കുന്ന ആശയങ്ങൾ ഭരണകൂടത്തിന് ഭീഷണിയാണ്. ആ ആശയങ്ങൾ പ്രയോഗത്തിൽ വരുത്തുന്ന ശരീരങ്ങൾക്ക് എഴുതുക, സംസാരിക്കുക, യാത്ര ചെയ്യുക, അല്ലെങ്കിൽ ചിലപ്പോൾ നിലവിലുള്ള മറ്റേതെങ്കിലും അവകാശങ്ങൾ വിനിയോഗിക്കുന്നത് പൂർണ്ണമായും "അപ്രാപ്യമാക്കണം". വിയോജിപ്പുള്ള മനസ്സുകളെ ഉൾക്കൊള്ളുന്ന ശരീരങ്ങൾക്ക് സായിബാബയുടെ കാര്യത്തിലെന്നപോലെ പത്തുശതമാനം ശാരീരികശേഷി പോലും അനുവദനീയമല്ല. ഒടുവിൽ 2024 മാർച്ചിൽ ബോംബെ ഹൈക്കോടതിയുടെ നാഗ്പൂർ ബെഞ്ച് ജി.എൻ. സായിബാബയേയും മറ്റ് 5 പ്രതികളേയും (അവരിൽ ഒരാൾ ജയിൽവാസത്തിനിടെ പന്നിപ്പനി ബാധിച്ച് മരിച്ചു) വിട്ടയച്ചത് പ്രോസിക്യൂഷൻ നൽകിയ "മോശമായ" തെളിവുകളും സാങ്കേതിക ക്രമത്തിൻ്റെ അഭാവവും ചൂണ്ടിക്കാട്ടിയായിരുന്നു. അദ്ദേഹത്തിൻ്റെ മോചനം തടയാൻ സ്റ്റേറ്റ് വീണ്ടും ശ്രമിച്ചെങ്കിലും ഇത്തവണ വിജയിച്ചില്ല. സായിബാബയുടെ ശരീരം നശിപ്പിക്കുന്ന പ്രവൃത്തി സാവധാനത്തിലും സ്ഥിരതയിലും ആയിരുന്നു. ജയിലിൻ്റെ കഠിനമായ സാഹചര്യങ്ങളിൽ വിവിധ രോഗങ്ങൾ അദ്ദേഹത്തെ ബാധിച്ചതിനാൽ, കഴിഞ്ഞ കുറച്ച് വർഷങ്ങളായി അദ്ദേഹത്തെ നാഗ്പൂർ സർക്കാർ ആശുപത്രിയിൽ ഒന്നിലധികം തവണ കൊണ്ടുപോകേണ്ടിവന്നു. അദ്ദേഹത്തെ ജെയിലിൽ നിന്ന് പുറത്താക്കണമെന്ന് ഡോക്ടർമാർ പോലും അഭ്യർത്ഥിച്ചെങ്കിലും ആ അപേക്ഷകൾ അവഗണിക്കപ്പെട്ടു. 2022 ഓഗസ്റ്റിൽ അദ്ദേഹത്തിന് കടുത്ത പനി വന്നു. ഇക്കാരണത്താൽ, അദ്ദേഹം കോവിഡ് ബാധിതനായി. COVID അദ്ദേഹത്തിന്റെ ആരോഗ്യത്തെ പ്രതികൂലമായി ബാധിച്ചു. തുടർച്ചയായി ജലദോഷവും പനിയും പിടിപെട്ടു; കൂടെക്കൂടെ പെട്ടെന്ന് വീഴുകയും അബോധാവസ്ഥയിലാവുകയും ചെയ്യുമായിരുന്നു. വാതരോഗം മൂർച്ഛിച്ചതോടെ അദ്ദേഹത്തെ ചികിത്സയ്ക്കായി ഡെൽഹിയിലെ എയിംസിലേക്ക് മാറ്റാൻ ജയിലിലെ ഡോക്ടർമാർ വാക്കാൽ നിർദ്ദേശിച്ചിരുന്നു. എന്നിട്ടും രേഖാമൂലമുള്ള റിപ്പോർട്ടുകളൊന്നും കുടുംബത്തിന് നൽകിയിട്ടില്ല. വൈദ്യസഹായം വാഗ്ദാനം ചെയ്യുന്നതിനുപകരം, കുപ്രസിദ്ധമായ "അണ്ഡാ സെല്ലിൽ" സായിബാബയെ ഏകാന്ത തടവിലാക്കി - ഉയർന്ന ബാരക്കുകളുള്ള ഒരു തണുത്ത സെല്ലിന്റെ മേൽക്കൂരയ്ക്ക് സമീപമുള്ള മുട്ടയുടെ ആകൃതിയിലുള്ള ജാലകത്തിലൂടെ ശൈത്യകാല രാത്രിയിലെ തണുത്ത കാറ്റ് കഠിനമായി വീശുമായിരുന്നു. 2020-ൽ, ഹൈക്കോടതി പ്രൊഫസറിന് അടിയന്തര ജാമ്യം നിഷേധിച്ചു, കൂടാതെ നാഗ്പൂർ ജെയിൽ കഴിയുന്ന അവസരത്തിൽ , രോഗിണിയായ തന്റെ അമ്മയെ മരണത്തിന് മുമ്പ് അവസാനമായി കാണാനോ, വീഡിയോ കാൾ നടത്താനോ അധികൃതർ അനുവദിച്ചില്ല. മോചിതനായപ്പോഴേക്കും സായിബാബയുടെ ശരീരം ചെറിയ അസുഖങ്ങൾക്ക് പോലും കീഴ്പ്പെടുത്താൻ കഴിയും വിധത്തിലായിരുന്നത് അദ്ദേഹത്തിൻ്റെ മരണത്തെ വേഗത്തിലാക്കി. ഒരു ജനാധിപത്യ രാജ്യത്ത് യുഎപിഎ പോലുള്ള നിയമങ്ങളുടെ സാധുതയെ ചോദ്യം ചെയ്യേണ്ടതിൻ്റെ ആവശ്യകത, വിയോജിപ്പുകൾ ഇല്ലാതാക്കാൻ ഏതെങ്കിലും സർക്കാർ ക്രിമിനൽ നീതിന്യായ വ്യവസ്ഥയെ ദുരുപയോഗം ചെയ്യുന്നത് തടയുക, എല്ലാ രാഷ്ട്രീയ തടവുകാരുടെയും ജാമ്യത്തിന്നും വേഗത്തിലുള്ള വിചാരണയ്ക്കും വേണ്ടി മുന്നോട്ട് പോകേണ്ടതിൻ്റെ ആവശ്യകത , എന്നിവയാണ് പ്രൊഫസർ ജിഎൻ സായിബാബയുടെ രക്തസാക്ഷിത്വം വീണ്ടും ഊന്നിപ്പറയുന്നത്. എല്ലാവർക്കും നീതി ലഭിക്കണമെന്ന ആഗ്രഹത്തെ ഇല്ലായ്മ ചെയ്യാൻ ആഗ്രഹിക്കുന്ന ഒരു സർക്കാരിനെതിരെയുള്ള ചെറുത്തുനിൽപ്പ് ശക്തിപ്പെടുത്താനും അത് ഓർമ്മിപ്പിക്കുന്നു. മൗലികാവകാശങ്ങൾ നിഷേധിക്കുന്നതിന് മറയായി ശിക്ഷാനടപടികൾ ഉപയോഗിക്കുന്ന ഒരു നീതിന്യായ വ്യവസ്ഥ എത്രമാത്രം ന്യായമാണ്? രാഷ്ട്രീയ പ്രേരിതമായ നീണ്ട കാലത്തെ നടപടികൾക്കൊടുവിൽ ഒരു വ്യക്തി കുറ്റവിമുക്തനാക്കപ്പെട്ടാലും, ഭരണഘടനാപരവും ജനാധിപത്യപരവുമായ മാനദണ്ഡങ്ങൾക്കനുസരിച്ച് അത് എത്രമാത്രം ദൈർഘ്യമേറിയതാണ്? ഈ ചോദ്യം നമ്മെ എല്ലാവരെയും അലട്ടും.

 ആർഎസ്എസ് അതിൻ്റെ ശതാബ്ദിയിലേക്ക് കടക്കുന്നു : 

ആധുനിക ഇന്ത്യയ്‌ക്കെതിരെ തുടർച്ചയായി നടക്കുന്ന ഫാസിസ്റ്റ് ആക്രമണത്തിൻ്റെ കഥ 

(എഡിറ്റോറിയൽ, ML അപ്‌ഡേറ്റ്, 14-20 ഒക്ടോബർ, 2024)

 ആർഎസ്എസ് ഇപ്പോൾ അതിൻ്റെ ശതാബ്ദിക്ക് തൊട്ട്മുമ്പുള്ള വർഷത്തിലേക്ക് കടന്നിരിക്കുകയാണ്. 99-ാമത് വർഷത്തിലെ വിജയദശമി ദിനത്തിൽ ആർഎസ്എസ് മേധാവി മോഹൻ ഭാഗവത് നടത്തിയ സ്ഥാപന ദിന പ്രസംഗം , ആർഎസ്എസ് അതിൻ്റെ ശതാബ്ദിയോട് അടുക്കുന്നത് എങ്ങനെയെന്നതിനെക്കുറിച്ചുള്ള പൊതുവായ ആശയപരിസരം  പങ്കുവെക്കുന്നുണ്ട് .  എന്നിരുന്നാലും, ആർഎസ്എസ് ഒരു ഗൂഢാലോചനാ സംഘടനയായിട്ടാണ്‌  നിലനിൽക്കുന്നതെന്നും,  അതിൻ്റെ അടിസ്ഥാന പ്രവർത്തന രീതിയും പ്രത്യയശാസ്ത്ര പ്രഖ്യാപനങ്ങളും പരസ്യ പ്രസ്താവനകളും നമുക്ക് ഒരു രൂപരേഖ മാത്രമേ നൽകുന്നുള്ളൂവെന്നും നാം എപ്പോഴും ഓർത്തിരിക്കണം.  ആർഎസ്സ്എസ്സ്  ഇപ്പോൾ അഭൂതപൂർവമായ അധികാരത്തിന്റെ  സ്ഥാനത്തു നിന്നാണ് പ്രവർത്തിക്കുന്നത് എന്നതിനാൽ, പ്രത്യേകിച്ചും ആർഎസ്എസിനെ ഒരു ഏകോപന കേന്ദ്രമോ മോദി സർക്കാരും വിശാലമായ സംഘ് ബ്രിഗേഡിൻ്റെ അജണ്ടയും പ്രവർത്തനവും തമ്മിലുള്ള പാലമോ ആയി വീക്ഷിക്കുകയാണെങ്കിൽ, കൂടുതൽ കാര്യങ്ങൾ തുറന്ന രീതിയിൽ വെളിപ്പെടുത്താൻ അതിന് കഴിവുണ്ട്. 

 ഹിന്ദു ഏകീകരണം ആർഎസ്സ്എസ്സിൻ്റെ കേന്ദ്ര പ്രമേയമായി തുടരുന്നുണ്ട് . ഈ ലക്ഷ്യം നേടുന്നതിന് വേണ്ടി അത് ഒരേസമയം ഇരകളുടെ ഭാഗവും  ഹിന്ദു അഭിമാനവും അധികാരവും ഉയർത്തിപ്പിടിക്കുന്ന ഭാഗവും അടങ്ങിയ ഇരട്ടത്താപ്പ് കളിക്കുന്നു.  അന്താരാഷ്ട്ര സംഭവവികാസങ്ങളെക്കുറിച്ച് പറയുമ്പോൾ  വിഷയങ്ങൾ തെരഞ്ഞെടുത്ത് സംസാരിക്കുകയും , ആക്രമണാത്മക ഇസ്ലാമിനെയും വംശനാശഭീഷണി നേരിടുന്ന ഹിന്ദുക്കളെയും കുറിച്ചുള്ള തൻ്റെ വിവരണത്തിന് അനുയോജ്യമായ രീതിയിൽ കാര്യങ്ങളെ വളച്ചൊടിക്കുകയും ചെയ്യുന്നു.  ഒരു വർഷം നീണ്ടുനിൽക്കുന്ന പലസ്തീനിലെ കുട്ടികളുടെയും സ്ത്രീകളുടെയും വംശഹത്യയെ  ഇസ്രായേൽ-ഹമാസ് സംഘർഷമായും ,  ബംഗ്ലാദേശിലെ ജനകീയ പ്രക്ഷോഭത്തെ  ഇസ്ലാമിക മതമൗലികവാദ ശക്തികളെ അധികാരത്തിലെത്തിക്കുന്ന അക്രമാസക്തമായ അട്ടിമറിയായും ചിത്രീകരിക്കുന്ന അതേ ശ്വാസത്തിൽ, ബംഗ്ലാദേശി നുഴഞ്ഞുകയറ്റത്തിൻ്റെ വർദ്ധിച്ചുവരുന്ന അപകടത്തെക്കുറിച്ചും ഇന്ത്യയിലെ ജനസംഖ്യാ അസന്തുലിതാവസ്ഥയെക്കുറിച്ചും അദ്ദേഹം സംസാരിക്കുന്നു.  ഭഗവത് ഒരിക്കലും ഉത്തരം നൽകാൻ മെനക്കെടാത്ത യുക്തിസഹമായ കുറെ ചോദ്യങ്ങൾ ഉയർത്തിവിടാൻ മാത്രമേ  ഇതുകൊണ്ട് കഴിയൂ.

 ആധികാരിക ജനസംഖ്യാപരമായ ഡാറ്റയുടെ ഏക ഉറവിടം ദശവത്സര സെൻസസ് മാത്രമാണ്, വാട്ട്‌സ്ആപ്പ് യൂണിവേഴ്‌സിറ്റി കിംവദന്തികൾ വ്യാജ ജനസംഖ്യാ കണക്കുകളും പ്രവചനങ്ങളും സജീവമായി പ്രചരിപ്പിക്കുന്നത് തടയാൻ പര്യാപ്തമാകുമായിരുന്ന 2021 ലെ സെൻസസ് പ്രവർത്തനം മോദി സർക്കാർ മാറ്റിവെച്ചു. അതിർത്തി കടന്നുള്ള നുഴഞ്ഞുകയറ്റം  മോദി യുഗത്തിൽ നടക്കുന്നുണ്ടെങ്കിൽ അതിൻ്റെ ഉത്തരവാദി രാജ്യത്തിൻ്റെ അതിർത്തി കാക്കാൻ അധികാരവും കടമയുമുള്ള  സർക്കാരിനാണ്.  ഇസ്ലാമിക മതമൗലികവാദികൾ ബംഗ്ലാദേശിൽ ഭരിക്കുകയും അവിടെയുള്ള ഹിന്ദു സമൂഹം വംശനാശഭീഷണി നേരിടുന്നതായി കാണുകയും ചെയ്യുന്നുവെങ്കിൽ, ഇന്ത്യ പ്രതീക്ഷിക്കേണ്ടത് മുസ്ലീങ്ങളുടെ നുഴഞ്ഞുകേറ്റമല്ല , ബംഗ്ലാദേശി ഹിന്ദുക്കളുടെ ഒരു കടന്നുകയറ്റമാണ്.  ഹിന്ദുക്കളെ അഭയാർത്ഥികളായി വിശേഷിപ്പിക്കാറുണ്ടെന്നും 'നുഴഞ്ഞുകയറുന്നവർ' എന്ന വാക്ക് ബംഗ്ലാദേശി മുസ്ലീങ്ങൾക്ക് മാത്രമാണെന്നും സംഘി പദാവലി പരിചയമുള്ള ആർക്കും അറിയാം.  എന്നിട്ടും ഇന്ത്യയിലെ സാധാരണക്കാരെ ഭയപ്പെടുത്താനും തെറ്റിദ്ധരിപ്പിക്കാനും ആർഎസ്സ്എസ്സ്  ബംഗ്ലാദേശ് നുഴഞ്ഞുകയറ്റമെന്ന വ്യാജപ്രചാരണം   

ഉപയോഗിക്കുന്നത് തുടരുകയാണ്.

 മിക്കവാറും എല്ലാ താരതമ്യ ആഗോള സൂചികകളും ഇന്ത്യയെ ഒരു തകർച്ചയുടെ സ്ഥിതിയിൽ , അല്ലെങ്കിൽ ഭയാനകമായ അവസ്ഥയിൽ കാണിക്കുന്നുണ്ടെങ്കിലും, മോദി കാലഘട്ടത്തിൽ ഇന്ത്യ എല്ലാ മേഖലകളിലും മികച്ച മുന്നേറ്റം നടത്തിയെന്ന് വിശ്വസിക്കാനാണ്  മോഹൻ ഭാഗവത് ആവശ്യപ്പെടുന്നത് .  ഗ്ലോബൽ ഹംഗർ ഇൻഡക്സ് ഇന്ത്യയെ വിശപ്പിൻ്റെ ആഗോള ഭൂപടത്തിൽ വീണ്ടും 'ഗുരുതരമായ' വിഭാഗത്തിൽ ഉൾപ്പെടുത്തിയിരിക്കുന്നു. 127 രാജ്യങ്ങളുടെ കൂട്ടത്തിൽ  ബംഗ്ലാദേശ്, നേപ്പാൾ, ശ്രീലങ്ക എന്നിവയ്ക്ക് പിന്നിൽ 105-ാം റാങ്ക് ആണ് ഇന്ത്യയ്ക്കുള്ളത് .  ഭാഗവതിൻ്റെ ദൃഷ്ടിയിൽ ഇന്ത്യയ്ക്കകത്തെ പ്രതിഷേധ പ്രസ്ഥാനങ്ങൾ എല്ലാം അസ്വസ്ഥതകളും പ്രതിബന്ധങ്ങളും സൃഷ്ടിക്കുന്നവയാണ് .  വടക്കുപടിഞ്ഞാറൻ അതിർത്തിയിലുള്ള പഞ്ചാബ്, ജമ്മു-കശ്മീർ, ലഡാക്ക് എന്നിങ്ങനെ ഇന്ത്യയുടെ മുഴുവൻ പ്രദേശങ്ങളും അദ്ദേഹം ഇത്തരത്തിലാണ് യഥാർത്ഥത്തിൽ ചിത്രീകരിച്ചത് ;  കടൽ അതിർത്തിയുള്ളവയിൽ  കേരളവും , തമിഴ്നാടും അങ്ങനെതന്നെ ;  ബിഹാർ മുതൽ മണിപ്പൂർ വരെയുള്ള പുർവാഞ്ചൽ മുഴുവനും അസ്വസ്ഥപ്രദേശമായി .  പലപ്പോഴും ജനാധിപത്യത്തെ പൂർണ്ണമായും സസ്പെൻഡ് ചെയ്യുന്നതിനും മനുഷ്യാവകാശങ്ങളുടെ നഗ്നമായ ലംഘനത്തിനുമുള്ള ആദ്യപടിയാണ് ഒരു പ്രദേശത്തെ "അസ്വാസ്ഥ്യ ബാധിതം"എന്ന് വിശേഷിപ്പിക്കുന്നത് .  രാജ്യത്തെ അസ്വസ്ഥമാക്കാനും അസ്ഥിരപ്പെടുത്താനുമുള്ള ശ്രമങ്ങൾ എല്ലാ ദിശകളിൽ നിന്നും ശക്തി പ്രാപിക്കുന്നുണ്ടെന്നാണ്  ഭാഗവത് നമ്മോട് പറയുന്നത് . വിയോജിപ്പുകളുമായി ബന്ധപ്പെട്ട് എല്ലാ സ്വേച്ഛാധിപതികൾക്കും പ്രശ്‌നങ്ങൾ ഉള്ളതുപോലെത്തന്നെ , ആർ എസ്സ് എസ്സിനെ വെല്ലുവിളിക്കുന്ന ഓരോ സ്വത്വത്തിലും  ഐഡൻ്റിറ്റിയിലും ആശയത്തിലും ആർഎസ്സ്എസ്സിന് പ്രശ്‌നമുണ്ട്.  അവയെ നേരിടാൻ എല്ലാ ശ്രമങ്ങളും നടത്തിയിട്ടും ആർഎസ്എസ് ഉചിതമായി പരാജയപ്പെടുകയായിരുന്നു.  ഗോൾവാൾക്കറുടെ കാലഘട്ടത്തിൽ നിന്ന് വ്യത്യസ്തമായി, ഒരു ഏകീകൃത രാഷ്ട്രത്തിനും രാഷ്ട്രപതി ഭരണത്തിനും വേണ്ടി പരസ്യമായി ആവശ്യപ്പെടാൻ 

ഭാഗവതിന് ഇന്ന് കഴിയില്ല.  എന്നാൽ പാർലമെൻ്ററി ജനാധിപത്യത്തിൻ കീഴിലെ സ്വത്വങ്ങളേയും  മത്സരസ്വഭാവത്തെയും നിയന്ത്രിക്കാനുള്ള   നിബന്ധനകൾ നിർദ്ദേശിക്കാൻ ആർഎസ്എസിന് ആകുമെന്ന് അദ്ദേഹം കരുതുന്നു. തൽഫലമായി ,  'കൃത്രിമ ഐഡൻ്റിറ്റികൾ' സൃഷ്ടിക്കുന്നതിന്റെ പേരിലും  ഇന്ത്യയുടെ സാംസ്കാരിക പാരമ്പര്യത്തിനും ദേശീയ താൽപ്പര്യങ്ങൾക്കും അന്യമായ വിദേശ ആശയങ്ങൾ ഇറക്കുമതി ചെയ്യുന്നതിന്റെ പേരിലും 'വേക്കിസ'ത്തെയും (രാഷ്ട്രീയമോ ,സാമൂഹ്യമോ ആയ അനീതികളുടെ പേരിൽ സ്ഥിരം രോഷം കൊള്ളുന്നവരെ ഇകഴ്ത്തി പരാമർശിക്കാൻ ഉപയോഗിക്കുന്ന ഒരു ഇംഗ്ലീഷ് പദമാണ് wokeism )  'സാംസ്കാരിക മാർക്‌സിസ'ത്തെയും കുറ്റപ്പെടുത്താൻ അദ്ദേഹം 2023 ലെ തൻ്റെ പ്രസംഗം ആവർത്തിക്കുന്നു.  ഭഗവതിൻ്റെ ആദർശ ഇന്ത്യയിൽ ഗൗരി ലങ്കേഷ്, സ്റ്റാൻ സ്വാമി, ജിഎൻ സായിബാബ, ഉമർ ഖാലിദ് എന്നിവരെപ്പോലെയുള്ളവർ പ്രകടിപ്പിച്ച  ഒരു വിയോജിപ്പിനും ഇടമില്ല - ഒരു 'ബദൽ രാഷ്ട്രീയത്തിനും' ഇടമില്ല, അതായത് സാമൂഹിക പരിവർത്തനത്തിൻ്റെയും സമഗ്ര നീതിയുടെയും പ്രവർത്തനക്ഷമമായ സമത്വത്തിൻ്റെയും എല്ലാ കാഴ്ചപ്പാടുകളും.  തുടച്ചുനീക്കണം.

 ദൈവങ്ങൾ പോലും ദുർബലരെ സംരക്ഷിക്കുന്നില്ലെന്ന് ഭാഗവത് പറയുന്നു.  മറ്റൊരു വിധത്തിൽ പറഞ്ഞാൽ, ന്യൂനപക്ഷങ്ങൾക്കും പാർശ്വവൽക്കരിക്കപ്പെട്ട വിഭാഗങ്ങൾക്കും നേരെയുള്ള ആക്രമണങ്ങൾ ദൈവങ്ങൾ പോലും അംഗീകരിക്കുന്ന  ഒരു  കടമയായി ഇപ്പോൾ വിശുദ്ധീകരിക്കപ്പെട്ടിരിക്കുന്നു.  ദുർബലർക്കെതിരെയുള്ള ആക്രമണം, നാനാത്വത്തിൻ്റെ ബുൾഡോസിംഗ്, വിയോജിപ്പുകളെ നിയമവിരുദ്ധമാക്കൽ, രാഷ്ട്രവുമായുള്ള ഭൂരിപക്ഷത്തെ ആശയക്കുഴപ്പത്തിലാക്കൽ - ഭാഗവതിൻ്റെ 99-ാം ആർഎസ്എസ് വാർഷിക പ്രസംഗം ഫാസിസ്റ്റ് ക്രമത്തിൻ്റെ ഈ ബ്ലൂപ്രിൻ്റ് മറയ്ക്കാൻ ശ്രമിക്കുന്നില്ല.   ആർഎസ്സ്എസ്സിൻ്റെ ശതാബ്ദി പര്യവേഷണം അനാവരണം ചെയ്യുമ്പോൾ,തീർച്ചയായും മഹാരാഷ്ട്രയിലെയും ജാർഖണ്ഡിലെയും നിയമസഭാ തിരഞ്ഞെടുപ്പുകളെ കുറിച്ച് ഭാഗവത് സൂക്ഷ്മമായി മനസ്സിലാക്കുന്നു.  അതിനാൽ, ആർഎസ്എസിൻ്റെ ശതാബ്ദി, ബിർസ മുണ്ടയുടെ 150-ാം ജന്മവാർഷിക വർഷവുമായും,    ക്ഷേത്രനിർമ്മാണത്തിൻ്റെ പ്രചാരണത്തിന് പേരുകേട്ട മറാത്ത കോൺഫെഡറസിയിലെ ഹോൾക്കർ ഹൗസിലെ രാജ്ഞി അഹല്യ ബായിയുടെ 300-ാം ജന്മവാർഷികവുമായും ഒരുമിക്കുന്ന വേളയാണെന്ന്  ഭാഗവത് നമ്മെ  ഓർമ്മിപ്പിക്കുന്നു.  ബിർസ മുണ്ടയുടെ  കൊളോണിയൽ വിരുദ്ധപ്പോരാട്ടത്തിന്റെ  ചരിത്രവും കോർപ്പറേറ്റ് കൊള്ളയ്‌ക്കെതിരായ തദ്ദേശവാസികളുടെ ചെറുത്തുനിൽപ്പിൻ്റെ നിലവിലെ സന്ദർഭവും മനപ്പൂർവ്വം മറച്ചുവെക്കുന്ന ഭാഗവത് , ദിയോഘറിൽ നുകുൽചന്ദ്ര സ്ഥാപിച്ച സത്സംഗത്തിൻ്റെ നൂറാം വാർഷികത്തോട് ബിർസ മുണ്ടയുടെ 150 -)0 ജന്മവാർഷികത്തെ ചേർത്തുക്കുകയാണ് .

 സ്വതന്ത്രഇന്ത്യയുടെ ഭരണഘടന അംഗീകരിക്കപ്പെടുമ്പോൾ അത് പരസ്യമായി നിരാകരിച്ച സംഘടന ഇന്ന് ഭരണഘടന അംഗീകരിച്ചതിൻ്റെ 75-ാം വാർഷികം ആചരിക്കുമ്പോൾ,  റിപ്പബ്ലിക്കിൻ്റെ ഭാവിയുടെ നിബന്ധനകൾ നിശ്ചയിക്കുകയാണ്.  അംബേദ്കർ പ്രവചനാത്മകമായി മുന്നറിയിപ്പ് നൽകിയ ഏറ്റവും വലിയ വിപത്താണിത്, റിപ്പബ്ലിക്കും അതിലെ ജനങ്ങളും ഈ ദുരന്തത്തെ മറികടക്കാൻ അവരുടെ സഹജമായ സർവ്വ ശക്തിയും ധൈര്യവും സമാഹരിക്കേണ്ടതുണ്ട് .