CPIML Lib Kerala

 ഇന്ത്യൻ ക്ലാസ് മുറികൾ ഭീകരതയുടെ അറകളായി മാറുമ്പോഴും ഇന്ത്യ ചന്ദ്രനിൽ ഇറങ്ങുകയാണ്.

ചന്ദ്രയാൻ 3 യുടെ വിജയകരമായ സോഫ്റ്റ് ലാൻഡിംഗ് ഐഎസ്ആർഒയുടെ ചരിത്ര നേട്ടത്തെ അടയാളപ്പെടുത്തുന്നു. ചന്ദ്രന്റെ ദക്ഷിണധ്രുവത്തിൽ ഇതാദ്യമായാണ് ഒരു ചാന്ദ്ര ദൗത്യം ഇറങ്ങുന്നത്, ഇത് ചാന്ദ്ര യാഥാർത്ഥ്യത്തെക്കുറിച്ചുള്ള പഠനത്തിനും പര്യവേക്ഷണത്തിനും കൂടുതൽ സാധ്യതകൾ തുറക്കുമെന്ന് പ്രതീക്ഷിക്കുന്നു. ഇതുപോലുള്ള ഇന്ത്യയുടെ ശാസ്ത്ര വൈദഗ്ധ്യത്തിന്റെ ഒരു പ്രധാന നാഴികക്കല്ല്, ശാസ്ത്ര സാങ്കേതിക മേഖലകളിൽ പൊതുവെയും ബഹിരാകാശ പര്യവേക്ഷണത്തിൽ പ്രത്യേകിച്ചും ഇന്ത്യയുടെ മൊത്തത്തിലുള്ള മുന്നേറ്റത്തിന് പ്രചോദനം നൽകാനുള്ള കഴിവുണ്ട്. ഇന്ത്യയുടെ റോഡ് നിർമ്മാണത്തെക്കുറിച്ചുള്ള ഏറ്റവും പുതിയ സിഎജി റിപ്പോർട്ട് അനുസരിച്ച്, ദ്വാരക എക്‌സ്‌പ്രസ് വേയുടെ ഓരോ മൂന്ന് കിലോമീറ്ററിനും വേണ്ടിവരുന്ന ചെലവിനേക്കാൾ കുറവാണ് 600 കോടി രൂപ ചെലവിൽ ഈ വിജയം നേടിയത് എന്നതും സന്തോഷകരമാണ്. ചന്ദ്രയാൻ 3 ദൗത്യത്തിലെ അംഗങ്ങളും ഈ ദൗത്യത്തിന്റെ വിജയത്തിന് സംഭാവന നൽകിയ ഐഎസ്ആർഒയുടെയും മറ്റ് സംഘടനകളുടെയും മുഴുവൻ ജീവനക്കാരും തീർച്ചയായും നമ്മുടെ ഹൃദയംഗമമായ അഭിനന്ദനങ്ങൾ അർഹിക്കുന്നു.

ചന്ദ്രയാൻ 3 യുടെ വിജയത്തിന്റെ നേട്ടം അവകാശപ്പെടാനുള്ള തിരക്കിലാണ് മോദി സർക്കാർ, എന്നാൽ സർക്കാർ അവഗണിച്ചിട്ടും ദൗത്യം യഥാർത്ഥത്തിൽ വിജയിച്ചുവെന്ന് സൂക്ഷ്മമായി പരിശോധിച്ചാൽ നമുക്ക് മനസ്സിലാകും. ഒരു ഉദാഹരണം എടുക്കുകയാണെങ്കിൽ, റാഞ്ചിയിലെ ഹെവി എൻജിനീയറിങ് കോർപ്പറേഷനിലെ ജീവനക്കാർക്കും എഞ്ചിനീയർമാർക്കും ചന്ദ്രയാൻ 3 നായി മൊബൈൽ ലോഞ്ചിംഗ് പാഡ് തയ്യാറാക്കി നിശ്ചിത സമയപരിധിക്ക് മുമ്പ് എത്തിച്ചുനൽകിയവർക്ക് പതിനെട്ട് മാസമായി ശമ്പളം ലഭിക്കുന്നില്ല. ഇന്ത്യയിലെ പൊതുമേഖലാ സ്റ്റീൽ പ്ലാന്റുകളുടെ നിർമ്മാണത്തിന് വളരെയധികം സംഭാവന നൽകിയ മാതൃ സ്ഥാപനമാണ് HEC. മോദി സർക്കാർ ആവശ്യമായ പ്രവർത്തന മൂലധനവും ജീവനക്കാരുടെ ശമ്പളവുംപോലും നിഷേധിച്ചതോടെ ഇന്ന് അതിനെ ഒരു രോഗാവസ്ഥയിലേക്ക് തള്ളിവിട്ടിരിക്കുകയാണ്. എന്നിട്ടും ദൗത്യം വിജയിച്ചപ്പോൾ, ഇന്ത്യയുടെ ചന്ദ്രനിലിറങ്ങിയ ചരിത്രനിമിഷത്തിന് സാക്ഷ്യം വഹിക്കാൻ ദശലക്ഷക്കണക്കിന് ഇന്ത്യക്കാർ അവരുടെ മൊബൈൽ ഫോണുകളിലും കമ്പ്യൂട്ടറുകളിലും ടിവി സ്ക്രീനുകളിലും ഒട്ടിച്ചേർന്നപ്പോൾ നരേന്ദ്ര മോദി ടിവി സ്ക്രീനിൽ മുഴുവൻ ജനശ്രദ്ധ പിടിച്ചുപറ്റി പ്രസംഗിക്കുകയായിരുന്നു.

രാഷ്‌ട്രീയ പ്രചാരണത്തിനും തിരഞ്ഞെടുപ്പ് ലാഭവിഹിതത്തിനും വേണ്ടി ചാന്ദ്ര ദൗത്യത്തെ കറന്നെടുക്കാനുള്ള തീവ്രശ്രമത്തിൽ, മോദി സർക്കാർ അതിനെ പ്രധാനമന്ത്രിയുടെ പരസ്യ വേദിയാക്കുക മാത്രമല്ല, മതപരമായ അന്ധവിശ്വാസത്തിന്റെയും ആധുനിക ശാസ്ത്രത്തിന്റെയും വിചിത്രമായ മിശ്രിതം സൃഷ്ടിക്കുകയും ചെയ്തിരി ക്കുന്നു. ശാസ്ത്രീയ മനോഭാവം പ്രോത്സാഹിപ്പിക്കുന്നതിനുള്ള പ്രചോദനമായി ചാന്ദ്ര ദൌത്യവിജയത്തെ ഉപയോഗിക്കുന്നതിന് പകരം, അതിനെ മതപരമായ അന്ധവിശ്വാസങ്ങളുമായി ബന്ധിപ്പിക്കാനുള്ള എല്ലാ ശ്രമങ്ങളും നടക്കുന്നു. ഇന്ത്യയുടെ ബഹിരാകാശ ഗവേഷണത്തിന്റെ സ്ഥാപകനും ആത്മാവുമായ വിക്രം സാരാഭായിയുടെ പേരിൽ ഉള്ള വിക്രം ലാൻഡറിന്റെ ലാൻഡിംഗ് പോയിന്റിന് ശിവശക്തി പോയിന്റ് എന്ന സ്പഷ്ടമായും ഹിന്ദു മതപരമായ പ്രാധാന്യമുള്ള പേര് നൽകുന്നതിന് പ്രധാനമന്ത്രി മോദി ഒട്ടും സമയം കളഞ്ഞില്ല. മോദി ശിവനെ ആവാഹിക്കുന്നിടത്ത് നിർത്തിയപ്പോൾ, ഒരു ഹിന്ദു മഹാസഭ നേതാവ് ചന്ദ്രനെ ശിവശക്തി കേന്ദ്രീകരിച്ച് ഹിന്ദു രാഷ്ട്രമായി പ്രഖ്യാപിക്കണമെന്ന് ആവശ്യപ്പെടുന്നത്രയും പോയി! ഇത് വളരെ കൂടിപ്പോയി എന്ന് തോന്നുകയാണെങ്കിൽ, ചാന്ദ്ര ദൗത്യവുമായി ബന്ധപ്പെട്ട വനിതാ ശാസ്ത്രജ്ഞരുടെ രക്ഷാധികാരിയെ ഉയർത്തിക്കാട്ടുന്ന രീതി നോക്കുക. അവരുടെ മതവിശ്വാസങ്ങളെ മുന്നിൽ നിർത്തി 'ആദർശ ഇന്ത്യൻ സ്ത്രീക" ളെ പ്രതിനിധീകരിക്കുന്നതായി അവതരിപ്പിക്കുകയാണ് ചെയ്യുന്നത്. അവർക്ക് ശാസ്ത്രം മതവുമായി ശക്തമായി ബന്ധപ്പെട്ടിരിക്കുന്നു എന്നതിനാണ്, ഊന്നൽ ;

പതിറ്റാണ്ടുകളുടെ ഗവേഷണത്തിന്റെയും സ്ഥിരോത്സാഹത്തിന്റെയും ഫലമാണ് ഐഎസ്ആർഒയുടെ മുന്നേറ്റം എന്നതിനല്ല .

എല്ലാ ദൗത്യങ്ങളും വിജയത്തിൽ കലാശിച്ചിട്ടില്ല, പക്ഷേ, ശാസ്ത്രജ്ഞർ പരാജയങ്ങളിൽ നിന്ന് പാഠങ്ങൾ ഉൾക്കൊള്ളുന്നു. പരാജയപ്പെട്ട ചന്ദ്രയാൻ 2 ദൗത്യം ചന്ദ്രയാൻ 3 യുടെ വിജയത്തിന് വഴിയൊരുക്കി. ഐഎസ്ആർഒയുടെ ശാസ്ത്ര സമൂഹത്തിലെ ഭൂരിഭാഗം അംഗങ്ങളും, സ്വാതന്ത്ര്യത്തിനു ശേഷമുള്ള ആദ്യ ദശകങ്ങളിൽ ആധുനിക ഇന്ത്യ കെട്ടിപ്പടുക്കാൻ തുടങ്ങിയ പൊതു-ഫണ്ട് വിദ്യാഭ്യാസ-ഗവേഷണ സംവിധാനത്തിന്റെ ഉൽപ്പന്നങ്ങളാണ്. വിദ്യാഭ്യാസത്തിന്റെയും ഗവേഷണത്തിന്റെയും സ്വകാര്യവൽക്കരണത്തിനായുള്ള വർദ്ധിച്ചുവരുന്ന പ്രേരണയോടെ പൊതുമേഖലയെപ്പോലെ, പൊതു-ഫണ്ട് വിദ്യാഭ്യാസ സമ്പ്രദായവും വ്യവസ്ഥാപിതമായി അവഗണിക്കപ്പെടുകയും ദുർബലമാവുകയും ചെയ്യുന്നു. ഉന്നതവിദ്യാഭ്യാസ-ഗവേഷണ സ്ഥാപനങ്ങളിൽ അന്ധവിശ്വാസത്തിന്റെയും , ഭാവനാ ദാരിദ്ര്യത്തിന്റെയും , ഭയത്തിന്റെയും നിശ്ശബ്ദതയുടെയും സംസ്‌കാരം പ്രോത്സാഹിപ്പിക്കുന്നതിനുവേണ്ടി അന്വേഷണവ്യഗ്രത, അക്കാദമിക് സ്വാതന്ത്ര്യം, കാമ്പസ് ജനാധിപത്യം എന്നിവ ഏതാണ്ട് ഈ മേഖല കളിലുടനീളം അടിച്ചമർത്തപ്പെടുന്നു. മതാന്ധതയുടെയും വിദ്വേഷത്തിന്റെയും ബലിപീഠത്തിൽ ശാസ്ത്രീയ സമീപനം ബലികഴിക്കപ്പെടുന്നതിൽ അതിശയിക്കാനില്ല. ഇതിന്റെ ഭയാനകമായ പ്രത്യാഘാതങ്ങളാണ് നമ്മെ തുറിച്ചുനോക്കുന്നത്.

പ്രൈമറി സ്‌കൂളിലെ പ്രിൻസിപ്പൽ ഗണിതശാസ്ത്ര ഗൃഹപാഠം ചെയ്യാത്തതിന്റെ പേരിൽ ഏഴ് വയസ്സുള്ള മുസ്‌ലിം സഹപാഠിയെ മർദ്ദിക്കാൻ വിദ്യാർത്ഥികളോട് നിർദ്ദേശിക്കുന്ന മുസാഫർനഗർ വീഡിയോവിലെ പ്രിൻസിപ്പൽ മുസ്‌ലിംകളെ അടച്ച് അസഭ്യം പറയുമ്പോൾ നമ്മെ ഓർമ്മിപ്പിക്കുന്നതും മറ്റൊന്നല്ല. ഹിറ്റ്‌ലറുടെ നാസി ജർമ്മനിയിലെ ക്ലാസ് മുറികളിൽ യഹൂദ കുട്ടികൾ എങ്ങനെയാണ് അപമാനിക്കപ്പെടുകയും പീഡിപ്പിക്കപ്പെടുകയും ചെയ്തിരുന്നതെന്നതിനു സമാനമാണ് അത്. തീവണ്ടികൾ മുതൽ തെരുവുകൾ, ടെലിവിഷൻ സ്റ്റുഡിയോകൾ, ഡിജിറ്റൽ പ്ലാറ്റ്‌ഫോമുകൾ, ക്ലാസ് മുറികൾ, കാമ്പസുകൾ തുടങ്ങി എഴുപത്തിയഞ്ച് വർഷത്തെ സ്വാതന്ത്ര്യത്തിനു ശേഷം, വിദ്വേഷം ഇന്ത്യയെ മുഴുവൻ അതിന്റെ വരുതിയിൽ ആക്കുമെന്ന ഭീഷണിയാണ് സംജാതമായിരിക്കുന്നത്.. ലൗ ജിഹാദിനെതിരെ പോരാടുന്നതിന്റെ പേരിൽ സംഘപരിവാർ സംഘടിപ്പിച്ച 2013 ലെ കലാപത്തിന്റെ പ്രഭവകേന്ദ്രമായിരുന്നു മുസാഫർനഗർ. ആ വിദ്വേഷവും വിഭജനവും മറികടന്ന് ഒരുമയുടെയും ഐക്യദാർഢ്യത്തിന്റെയും പുതുക്കിയ ബന്ധങ്ങൾ കെട്ടിപ്പടുക്കുന്നതിൽ കർഷക പ്രസ്ഥാനം വിജയിച്ചു. പടിഞ്ഞാറൻ യുപിയിലെയും ഹരിയാനയിലെയും വിദ്വേഷത്തിന്റെയും അക്രമത്തിന്റെയും ശക്തികളാൽ ആ ഐക്യം വീണ്ടും വെല്ലുവിളിക്കപ്പെടുകയാണ്, കർഷക പ്രസ്ഥാനവും സമാധാനവും നീതിയും ഇഷ്ടപ്പെടുന്ന എല്ലാ ശക്തികളും ഈ ഗൂഢാലോചന പരാജയപ്പെടുത്താൻ ദൃഢമായ ചെറുത്തുനിൽപ്പ് നടത്തേണ്ടതുണ്ട്.

വിദ്വേഷത്തിന്റെയും പീഡനത്തിന്റെയും അരങ്ങായി മാറിയ സ്‌കൂളിലെ കുറ്റവാളി പ്രിൻസിപ്പൽ തൃപ്ത ത്യാഗിക്കൊപ്പം ബിജെപി നേതാക്കൾ പരസ്യമായി നിലയുറപ്പിച്ചു. സ്‌കൂൾ അടച്ചുപൂട്ടി സമീപത്തെ മറ്റ് സ്‌കൂളുകളിൽ വിദ്യാർഥികളെ ചേർക്കുന്നതായി റിപ്പോർട്ടുണ്ട്. വ്യവഹാരം ഒഴിവാക്കാനും ഒത്തുതീർപ്പിലെത്താനും പ്രബലമായ സാമൂഹിക-രാഷ്ട്രീയ ശക്തികളുടെയും നിർഭാഗ്യവശാൽ സംശയാസ്പദമായ ചില കർഷക നേതാക്കളുടെയും സമ്മർദ്ദത്തിൻകീഴിലാണ് ആഘാതവും പീഡനവും അനുഭവിച്ച വിദ്യാർത്ഥിയുടെ കുടുംബം. അത്തരം കാര്യങ്ങളിൽ അനുരഞ്ജനം സാധ്യമാകേണ്ടത് സത്യത്തിന്റെയും നീതിയുടെയും അടിസ്ഥാനത്തിലായിരിക്കണം. വിദ്വേഷം വിതരണം ചെയ്യുന്നവരും അക്രമം നടത്തുന്നവരും സംരക്ഷിക്കപ്പെടുമ്പോൾ തീർച്ചയായും മറിച്ചാണ് സംഭവിക്കുന്നത്. ,ഈ ഭയാനകമായ സംഭവത്തിലേക്ക് പൊതുജനശ്രദ്ധ ആകർഷിക്കുന്നതിനായിട്ടാണ് വസ്തുതാപരിശോധനയിലൂടെ മുഹമ്മദ് സുബൈർ ശ്രമിച്ചത്. ഈ അക്രമത്തിൽ പങ്കെടുക്കാനോ അത് കാണാനോ പ്രേരിപ്പിക്കപ്പെട്ട കുട്ടികളും ഫാസിസ്റ്റ് ഭീകരതയുടെ ഇരകളാണെന്ന് നാം മനസ്സിലാക്കണം, ഒപ്പം തന്നെ അതിന് വിധേയരാകേണ്ടിവന്ന ആഘാതവും പീഡനവും അനുഭവിച്ച കുട്ടിയും. രാഷ്ട്രീയമോ മതപരമോ ആയ ബാനറുകൾക്ക് കീഴിലോ ടെലിവിഷൻ അവതാരകരായോ അഭിപ്രായ നിർമ്മാതാക്കളായോ, വിവിധ സോഷ്യൽ മീഡിയ പ്ലാറ്റ്‌ഫോമുകളിൽ സ്വാധീനം ചെലുത്തുന്നവരോ ആയാലും ഫാസിസ്റ്റ് പ്രചാരകർ ദിനംപ്രതി നടത്തുന്ന വിദ്വേഷ പ്രചാരണം, ഇപ്പോൾ ഇന്ത്യയിലെ കുട്ടികളുടെ സംവേദനക്ഷമമായ മനസ്സുകളെ വികൃതമാക്കാൻ പ്രൈമറി സ്കൂളുകളിലെ ക്ലാസ് മുറികളിൽ എത്തിയിരിക്കുന്നു. ഇതിലെ ഭയപ്പെടുത്തുന്ന സൂചനകൾ അവഗണിച്ചാൽ, വരും നാളുകളിൽ ഇതിലും വലിയ ആപത്തുകൾ ക്ഷണിച്ചു വരുത്താൻ അത് ഇടയാക്കും .