അഫ് ഗാനിസ്ഥാൻ താലിബാൻ ഭരണത്തിന് കീഴിൽ :
സിപിഐ എംഎൽ പ്രസ്താവന
ന്യൂ ഡെൽഹി , ആഗസ്ത് 16 ,2021
ഏറെ ആശങ്കാജനകമായ സംഭവവികാസങ്ങളിലൂടെയാണ്
അഫ് ഗാനിസ്ഥാൻ കടന്നുപോകുന്നത്. അതിശയിപ്പിക്കുന്ന വേഗത്തിൽ താലിബാൻ ഭരണം പിടിച്ചെടുത്തതുമുതൽ ആ രാജ്യം ഭയാനകമായ അരാജകതയുടെയും അനിശ്ചിതത്വത്തിന്റെയും നാളുകളിലേക്ക് തള്ളിവിടപ്പെട്ടിരിക്കുകയാണ്. സാധാരണ പൗരന്മാർക്കെതിരേ ഹിംസാത്മകമായ കയ്യേറ്റങ്ങളും സ്ത്രീകൾക്കെതിരായ അതിക്രമങ്ങളും മനുഷ്യാവകാശങ്ങൾക്കും പൗരസ്വാതന്ത്ര്യങ്ങൾക്കുമെതിരായ കടന്നാക്രമണങ്ങളും വ്യവസ്ഥാപിതമായ മാതൃകയിൽ നടന്നുവരുന്നതായി റിപ്പോർട്ടുകൾ സൂചിപ്പിക്കുന്നു.
അഫ് ഗാനിസ്ഥാന്റെ ഇന്നത്തെ ദുരവസ്ഥയ്ക്ക് പൂർണ്ണമായും ഉത്തരവാദി അമേരിക്കൻ വിദേശനയം ആണ്. 1980 ,1990 ദശകങ്ങളിൽ താലിബാനെ വളർത്തി പ്രോത്സാഹിപ്പിക്കുകയും , 2001 സെപ്റ്റംബർ 11 ന് ശേഷം അഫ്‌ഗാനിസ്ഥാനിൽ അധിനിവേശം നടത്തുകയും ചെയ്ത ശേഷം യാതൊരു തയ്യാറെടുപ്പും ഇല്ലാതെയാണ് ഇപ്പോൾ അമേരിക്ക അഫ് ഗാനിസ്ഥാനിൽ നിന്ന് സൈന്യത്തെ പിൻവലിക്കാൻ തീരുമാനിച്ചത്. അമേരിക്കൻ അധിനിവേശവാഴ്ചയുടെ സാമാന്യമായ മാതൃകതന്നെയാണ് അഫ് ഗാനിസ്ഥാനിലും അരങ്ങേറിയിട്ടുള്ളത് . അതിന്റെ ഫലമായിട്ടാണ് അഫ് ഗാനിസ്ഥാനിലെ ജനങ്ങൾ ഇത്രയേറെ ദുരിതങ്ങൾ അനുഭവിക്കാൻ ഇടവന്നത്.
1996 മുതൽ 2001 വരേയുള്ള ഒരു കാലഘട്ടത്തിൽ താലിബാൻ ഭരണത്തിന്റെ പ്രതിലോമപരവും സ്വേച്ഛാധികാരപ്രമത്തവും ആയ നയങ്ങളുടെ പ്രത്യാഘാതങ്ങളും ദുരിതങ്ങളും ജനങ്ങൾ അനുഭവിച്ചതാണ്. തന്മൂലം ഇന്ന് ലോകം പൊതുവിലും , വിശേഷിച്ചും ദക്ഷിണേഷ്യയും ഈ മേഖലയുടെ ഭാവി എന്താകുമെന്നതിനെക്കുറിച്ച് കടുത്ത ഭയാശങ്കകളിൽ ആണ്. കടുത്ത സാമൂഹ്യ സംഘർഷങ്ങൾക്കിടയിൽ ജീവിക്കുന്ന ഈ രാജ്യത്തിലെ ജനത സമാധാനത്തിനും, പുരോഗതിക്കും ജനാധിപത്യത്തിനും വേണ്ടിയുള്ള സമരവുമായി മുന്നോട്ട് പോകുമ്പോൾ നടത്തുമ്പോൾ ലോകത്തിലെ പൊതുജനാഭിപ്രായവും അന്താരാഷ്ട്ര സമൂഹത്തിൽനിന്നുള്ള അനുകൂലമായ സമ്മർദ്ദവും അവരെ വിജയത്തിലെത്താൻ തുണയ്ക്കുമെന്ന് പ്രത്യാശിക്കുന്നു.
അഫ് ഗാനിസ്ഥാനിൽ കുടുങ്ങിപ്പോയ എല്ലാ ഇന്ത്യൻ പൗരന്മാരെയും സുരക്ഷിതരായി നാട്ടിൽ എത്തിക്കണമെന്ന് ഇന്ത്യാ ഗവണ്മെൻറിനോട് ഞങ്ങൾ ആവശ്യപ്പെടുന്നു. വിദ്യാഭ്യാസാവശ്യത്തിനും, തൊഴിൽ പരമായും മറ്റും ഉള്ള വേറെ കാരണങ്ങൾ കൊണ്ടും ഇപ്പോൾ ഇന്ത്യയിൽ കഴിയുന്ന അഫ് ഗാനിസ്ഥാൻ പൗരർക്കും പൂർണ്ണ സംരക്ഷണവും സുരക്ഷിതത്വവും ഇന്ത്യാ ഗവൺമെന്റ് ഉറപ്പുവരുത്തണം. അഫ് ഗാനിസ്ഥാനിൽ നിലവിലുള്ള പ്രതിസന്ധികൾ മറികടന്നു സമാധാനാന്തരീക്ഷം പുനഃസ്ഥാപിക്കപ്പെടുന്നത്‌വരേയും നാട്ടിലേക്ക് മടങ്ങാൻ കഴിയാതെ വരും എന്നതിനാൽ അവർ ഇന്ത്യയിൽ അഭയം തേടാൻ സാധ്യതയുണ്ട്. അങ്ങനെയൊരു സാഹചര്യത്തിൽ മുസ്ലീങ്ങളായ അഫ് ഗാൻ അഭയാർത്ഥികൾക്കെതിരെ ഒരു കാരണവശാലും സർക്കാരിന്റെ ഭാഗത്തുനിന്ന് വിവേചനം ഉണ്ടാവാൻ പാടില്ല. അഭയാർത്ഥികളെ ഹിന്ദുവെന്നും മുസ്‌ലിം എന്നും വേർതിരിച്ചു വിവേചനം നടപ്പാക്കുന്ന പൗരത്വ നിയമ ഭേദഗതിയുടെ അർത്ഥശൂന്യത ഏവർക്കും ബോദ്ധ്യമാവുന്ന സമയമാണ് ഇത് .
അഫ് ഗാനിസ്ഥാനിൽ സമാധാനവും സ്ഥിരതയും ജനാധിപത്യവും സ്ഥാപിക്കാൻ ആഗ്രഹിക്കുന്ന ആ രാജ്യത്തിലെ ജനതയ്ക്കും തല്സംബന്ധമായി ലോകവ്യാപകമായി ഉയർന്നുവരുന്ന പൊതുജനാഭിപ്രായത്തിനും ഒപ്പം ഞങ്ങൾ നിലകൊള്ളുന്നു; അതെ സമയം അഫ് ഗാനിസ്ഥാൻ സംഭവവികാസങ്ങൾ ഒഴിവുകഴിയായി പ്രയോജനപ്പെടുത്തിക്കൊണ്ട് ഇന്ത്യയിൽ മുസ്‌ലിം വിരോധവും വർഗ്ഗീയ അസ്വാസ്ഥ്യങ്ങളും കുത്തിപ്പൊക്കാൻ തക്കം പാർത്തിരിക്കുന്ന തൽപരകക്ഷികളുടെ ശ്രമങ്ങൾക്കെതിരെ ജാഗ്രത പുലർത്തനും അവയെ പരാജയയപ്പെടുത്താനും ഇതോടൊപ്പം ആഹ്വാനം ചെയ്യുന്നു. മതതീവ്രവാദപരമായ രാഷ്ട്രീയ ശക്തികൾ ആധിപത്യം ആർജ്ജിച്ചതുമൂലം അഫ് ഗാനിസ്ഥാൻ ജനത അനുഭവിക്കുന്ന ദുരിതങ്ങൾ ഇന്ത്യയ്ക്ക് പാഠമാകേണ്ടതാണ്‌ . മതാധിഷ്ഠിത തീവ്രവാദത്തിന്റെ രാഷ്ട്രീയം തളിക്കളഞ്ഞുകൊണ്ട് സാമുദായിക സൗഹാർദ്ദത്തിനും സാമൂഹ്യ പുരോഗതിക്കും ജനാധിപത്യാവകാശങ്ങളുടെ സംരക്ഷണത്തിനും വേണ്ടിയുള്ള സമരങ്ങൾക്ക് കൂടുതൽ കരുത്ത് പകരേണ്ട
സന്ദർഭം കൂടിയാണ് ഇത്.
- കേന്ദ്ര കമ്മിറ്റി,
സിപിഐ എംഎൽ .
No comments:
Post a Comment